黎燕珊加盟無綫乜「戲」都受
傳奇級亞姐冠軍黎燕珊宣布加盟無綫，極有可能是最後一位過檔無綫的亞姐！一直醉心演戲的她受訪時坦言條件相當滿意，會向各監製自薦，希望長拍長有並揚言「我任用！」
第一屆「亞洲小姐」冠軍黎燕珊（Eva）昨日宣布加盟無綫大家庭，合約亦於昨日正式生效，這位53歲傳奇級亞姐更極有可能是繼羅霖、陳煒後，最後一位加盟無綫的亞姐！由於事出突然，記者收到消息時隨即致電Eva詢問詳情，她坦言一直以來都有與無綫傾合作：「多年來都有，依家傾得成係時機成熟，條件各方面我都好滿意！我要多謝樂易玲同曾勵珍畀呢個機會我，促成呢次大家合作機會！（你唔係同奇妙電視有合約在身？）完晒啦！之前係部頭約嚟！」
紓緩「憶子成狂」
一直以主持工作為主的Eva，受訪時坦言其實一直醉心演戲，為了再投入電視劇世界，才有今次的決定：「今次條件好滿意！我一直係一個演員，好鍾意演戲，早前演完舞台劇後戲癮大發，希望今次可以拍多啲唔同類型嘅劇，最希望可以同鮑起靜、薛家燕合作，時裝同古裝都冇所謂。」
至於會否再做主持，Eva表示有機會的話都想做：「可以話係自薦畀各大監製，真係任用呀！」又笑指自己會藉拍劇來紓緩「憶子成狂」：「遲啲個仔去英國讀書，希望多啲工作充實自己，填滿啲時間！」
文：影視組