兩個場地兩種享受 龍劍笙跨年20場《牡丹亭驚夢》
粵劇名伶龍劍笙（阿刨）年底將再踏台板，在港演出仙鳳鳴劇團戲寶《牡丹亭驚夢》，是廣大粵劇戲迷、刨迷佳音！更令人喜出望外的是，經過主辦單位負責人丘亞葵的大力游說後，阿刨由原定演出10場，倍增至共演出20場，以滿足更多熱情戲迷需要，令刨迷大飽眼福！
名伶龍劍笙2015年底、2016年初在港演出合共16場的《紫釵記》，叫好叫座，亦令不少刨迷高呼：「未夠喉！」一直渴望再欣賞阿刨台上風采的劇迷如今有福了，事關經新娛國際負責人丘亞葵（Vigo）多番游說、居中協調策劃下，阿刨年底將返港演出《牡丹亭驚夢》，演出場數更增至20場，包括12月29日至2018年1月7日、於文化中心演出10場，以及2018年1月11至21日（1月16日休息）、於理工大學賽馬會綜藝館演出10場，盡量滿足戲迷需要，一解之前阿刨在港演出《紫》劇時，戲迷一票難求的慨嘆！
9月加拿大綵排
Vigo指阿刨雖然人在加拿大溫哥華，但對香港演出一直念茲在茲，他說：「阿刨一向對演出認真、有要求，呢排我哋幾乎日日聯絡，佢畀咗好多畫作，同埋當年仙鳳鳴任劍輝、白雪仙演出嘅劇照我參考，佢好細心，我都一一跟足，負責喺香港執行，戲服會參照舊方案，搵咗戲行大師傅去做啲豐富同加強嘅工作，令啲衫現代感啲同靚啲！兩位花旦李沛妍同鄭雅琪，9月中起程去加拿大，綵排兩個禮拜，阿刨同佢哋好好感情同默契，排熟咗，大隊會返香港再排。」
Vigo指促成是次演出，過程充滿機緣，他說：「我同阿刨認識多年，佢事事認真，我最鍾意同佢合作，我當然希望阿刨年年返香港演出，一來佢係大師級，佢嘅演出可以影響到新一代演員，亦推動到本地粵劇氣氛，二來佢真係票房保證！呢次游說佢加碼演夠20場，係源於今年年頭喺個電台頒獎禮，我遇到一位同阿刨好熟嘅政府前高層，佢話：『演10場梗係唔夠，我哋都想佢返得嚟就演多啲，你再游說吓！』經佢鼓勵，我又再嘗試，終於得到阿刨首肯。」
藝術成就添說服力
不過，Vigo又要解決場地問題：「因為文化中心要一年前Book定，幾經物色，終於搵到理工大學賽馬會綜藝館，呢度好舒服，同觀眾距離又近啲，但問題係場地會以學校本身嘅活動列作優先，傾嘅時候學校放緊長假，我搵校董會傾，當然阿刨嘅藝術成就都幫咗我增添好多說服力，結果場地搞掂！由於兩個場地，今次布景都做兩份，就番唔同場地出入位尺寸，至於台就一樣，對演員演出冇唔同，總之希望盡善盡美，令觀眾有最佳嘅視聽享受！」
文：影視組