連詩雅 周柏豪「亂倫」 雨僑上堂學做人妻

雨僑（右）與連詩雅為新片宣傳時，自言努力學習做羅力威老婆。

張繼聰、蔡瀚億、林敏驄、林盛斌、陳詩慧、雨僑及連詩雅等昨晚為電影《西謊極落：太爆‧太子‧太空艙》宣傳，姍姍來遲的林敏驄拉周柏豪落水笑言：「我準時過周柏豪，佢都未到。」林盛斌（Bob）即窒阿驄：「佢今日唔嚟呀！」又取笑對方嘴角生瘡，林敏驄即發揮急才指這粒是「太空瘡」硬銷新片，貪玩的他更作狀將「瘡液」抹在Bob的面上，十分搞笑。連詩雅則指在新戲與周柏豪有咀戲，由於一向視對方為哥哥，故她搞笑地表示演出時有少少亂倫Feel。

要包容羅力威缺點

剛過了生日的雨僑表示已與粉絲開派對慶祝，男友羅力威亦有出席，問到生日願望是否結婚生仔？她自爆已經上了婚前輔導班，問到是否「好事近」？她笑說：「今年趕唔切，之前上婚前輔導課，發現有好多嘢要準備先適合做人老婆。（係咪就結婚？）努力中，學緊做人老婆，有確實計劃再通知大家。（差啲咩？）結婚好多嘢冇得逃避，除咗要欣賞對方嘅優點，仲要包容對方嘅缺點。」

張繼聰則透露送了十歲的兒子張瞻到上海參加足球訓練營，接受十天訓練，他說：「爺爺同佢上去，日日同佢視像見面，佢同啲同學仔相處得好好，亦要自己洗衫照顧自己，係一個好好嘅鍛煉，我都老懷安慰。不過見佢間房就一日比一日亂。（畀佢做職業足球員？）如果佢有咁嘅能力同天分，當然會栽培佢！」

陳詩慧在台上作狀摑林敏驄！	一眾演員逼埋「太空艙」合照。	張繼聰表示會栽培囝囝做足球員。

文：影視組