李美琪疑夢遊釀「血案」
藝人李美琪（Monnie）的爸爸是牛雜麵店老闆，所以Monnie有「牛雜妹」綽號。她說：「細個時候爸爸仲未開舖頭，佢都做緊大廚，而媽咪就擔當家庭主婦角色，照顧我哋三兄妹。」Monnie指爸爸雖然忙賺錢，但每當放假，都會帶家人四圍玩：「嗰時仲未興電腦，科技未算好發達，有部手提電話已經係好奢侈，所以我哋啲娛樂真係好少，捉吓棋，去街影吓相已經好開心。」
Monnie自爆小時候健康很差，經常發燒及流鼻血：「試過有幾次好誇張，瞓醒覺有成撻鼻血喺塊面，最初爸爸媽媽都嚇親，之後佢哋都慣咗。我仲懷疑自己細個有夢遊症，因為我同家姐瞓碌架床，我瞓上格床，但有好幾次醒咗，竟然喺下格床瞓喺家姐隔籬，又或者瞓咗喺地下。有次瞓醒我喺地下，塊面仲有撻鼻血，好似凶殺案現場咁，都幾得人驚。」
