美國老牌搖滾巨星Alice Cooper於70年代獲贈已故普普藝術大師安迪華荷作品，一直收埋喺貨倉長達40多年卻懵然不知，估計價值已由約兩萬港元狂飆至9,068萬港元！
69歲搖滾男歌手Alice Cooper真係唔識貨，連自己擁有大師真迹都可以唔記得！其經理人Shep Gordon日前接受《衞報》（Guardian）訪問時透露於70年代，Alice同安迪分屬老友，Alice開騷時假扮坐電椅一幕跟安迪創作的系列《Death and Disaster》中作品《Little Electric Chair》（小電椅）的電椅十分相似。安迪則在台下捧場，二人感情相當要好。
當時Alice的模特兒女友Cindy Lang便花了約兩萬港元買下紅色版本的《Little》畫作，送給對方作生日禮物，Alice其後將名畫放在貨倉內，跟其他演唱會的道具如電椅等放在一起。
直至最近，Shep跟藝術品經銷商談起安迪作品時才回想起來：「Alice母親記起名畫放咗喺貨倉，於是我們就去搵畫。」名畫已獲安迪作品專家Richard Polsky核實是真迹。
而另一幅同為《Death》系列作品之一、綠色版本的《Little》畫作於2015年曾拍賣過，以約9,068萬港元被投得，因此估計Alice今次失而復得的名畫價值與之相若！難怪Shep說：「你真係要睇吓Alice知道幅畫價值後嘅樣，佢簡直完全唔敢相信，仲話：『你講真o架？我有呢幅畫喎！』」
文：外娛組