貴為「宅男女神」的孫慧雪昨日在社交平台宣布誕下男丁，重8磅10安士的囝囝Riley，身長頭大似足爸爸，開刀生產的雪雪透露近日為照顧大食BB手忙腳亂冇覺好瞓，更患上感冒！
35歲無綫藝員孫慧雪近月不時在網上晒巨肚，大家都估計BB會是巨嬰，昨日雪雪在社交平台報喜，宣布正式榮升媽咪，囝囝Riley重8磅10安士，她上載跟囝囝頭貼頭合照，並留言：「在此要感謝為我們迎接這位小寶寶的醫生和在產前不斷為我打氣的護士，還有一直關心我們的家人和朋友們，愛你們喔！原來逗留在肚子裏差不多有十個月的小人兒，是長這個模樣，既陌生又熟悉，爸爸媽媽會一直愛着你！圓圓的臉像個小饅頭！」
雪雪受訪時透露上月28日經醫生建議剖腹產子，但手忙腳亂加上生產後即患感冒，因此隔了幾天才公布：「我一直戴住口罩，所以BB仲未見過我個樣！佢個樣同佢老竇一模一樣，下巴尖尖，面形、手指、腳趾就似我，之前我哋怕佢冇咩頭髮，所以生之前我食好多芝麻糊，好彩佢出世都有少少頭髮。」雪雪表示BB身長53cm，頭圍亦過10cm，是個大食BB：「醫院個個姑娘都知佢好大食，我生完都要成日醒住同餵佢，瞓得唔係咁好，不過老公好好，入院到成個生產過程都陪住我，好多嘢都幫我準備！」
講到一眾姊妹反應，雪雪笑言蔡思貝及賴慰玲竟在她生產當日心有靈犀，主動問她：「你係咪生緊仔呀？」另一好友林秀怡則會負責幫忙派薑醋。
思貝表示得悉好友生BB很感動：「一見到BB個樣，我不期然笑咗出嚟，同佢老公餅印咁，我都好期待到我有小朋友，然後我哋嘅小朋友可以開心打成一片，繼續做朋友！」懷孕中的賴慰玲亦大讚雪雪好叻，並感受到母愛的偉大。
文：影視組