香香怕眼冤諗計餵飽老公
岑麗香於無綫新劇與黃浩然有感情戲，她表示有咀戲一定會向老公「強強」備案，更笑言播咀戲當晚，會預約一間沒有電視的餐廳食飯，免得老公呷醋兼眼冤。
藝人岑麗香（香香）、陳煒、馮盈盈、黃浩然等昨日於將軍澳電視城出席新劇《果欄中的江湖大嫂》開鏡拜神。去年成為人妻的香香透露於劇中與黃浩然飾演一對情侶，她指之前二人合作《無雙譜》只有幾場戲，很期待今次正式做拍檔。
拒絕夫妻檔合作
提到黃浩然預告二人將有咀戲，香香說：「有咩？我淨係知道有攬戲。」她表示雖然之前拍過咀戲，但今次要同老公交代。問到會否擔心老公看到會呷醋，她笑說：「我知邊一集，可能嗰晚約埋朋友出街食飯，去有音樂有蠟燭嘅餐廳，冇電視睇。」她指老公明白她的工作需要，自己亦會令對方舒服些，但表示應該不會夫妻檔合作。
同場的黃浩然前日出席郭鋒太太歐陽珮珊的喪禮，他透露歐陽珮珊離世後，自己每隔兩、三日便會致電問候郭鋒：「佢有兩、三次喺劇裏面做我阿爸，畀好多正能量我。我一入嚟TVB唔習慣，佢畀好多做人同演戲嘅意見我。依家佢冇正能量，當然要畀番佢。」他指郭鋒心情已平復，又指視對方如家人。對於有指是郭鋒的過繼兒子嘉輝日前現身靈堂，黃浩然表示未有機會向對方了解：「留畀佢交代，佢覺得唔方便講，都尊重番佢。但依家畀啲空間佢，唔好騷擾佢。」
馮盈盈自認淑女
此外，馮盈盈對於首次拍劇感緊張，並透露劇中與楊明會發展成情侶，問到有否咀戲，她說：「好似安排緊。（螢幕初吻畀楊明？）都驚呀！唔知點錫得靚，好有挑戰性。我係淑女，個角色好難揣摩。」
文：影視組