杜小喬肉搏劉俊謙獻初夜
被網友封為「娘娘」的網絡紅人杜小喬形象向來清純，最近為拍劇「獻出初夜」首度拍攝床戲，與新進型男劉俊謙上床攬實激咀，兩人同樣經驗欠奉，緊張得硬鬥硬，小喬更要食香口珠減壓。
在網上擁有逾35萬Fans的杜小喬近期開始多拍劇及電影，努力轉型做演員，她在ViuTV劇集《瑪嘉烈與大衛系列 前度》中戲份甚多，與男主角劉俊謙在近日劇情發展中撻着成為情侶。
向來惜肉如金的小喬從未拍過親熱戲，今次豁出去獻出螢幕初吻及初夜！明晚劇情講到小喬與劉俊謙到日本旅行，孤男寡女共處一室，小喬破格拍出浴戲，雖然未有騷事業線，但騷肩對她來說已是跨出一步，其後阿謙在房中發現有安全套，即「心思思有件事」，兩人遂自然地在床上激咀，首次拍床戲的小喬怕醜面紅紅，情慾高漲樣勢必引死宅男！
食香口珠除口氣
小喬與阿謙同樣是首次拍床戲，鏡頭前扮投入，其實尷尬及緊張到硬晒軚，小喬說：「知道有床戲同沖涼鏡頭，嗰日全日都坐唔安食唔落，事前我不停食香口珠，可以辟口氣同令自己冇咁緊張，未埋位已經食晒成包喇！拍完呢場戲後，更佩服拍過親熱戲嘅演員，原來一啲都唔簡單，要有足夠心理準備，估唔到第一次拍長劇就有大膽演出，但可能就因為第一次，更容易拿捏角色羞澀嘅感覺。」她笑言最有趣是導演親自與阿謙試戲，兩個男人攬作一團別有一番風味。
阿謙表示平日跟小喬經常互窒，但當日突然靜晒不敢撩對方：「全世界望住我哋攬攬錫錫，仲要好多工作人員都係大男人，幾咁尷尬！最搞笑係有位幕後平日成日講鹹濕笑話，但嗰日佢都盡量克制自己，我諗係唔想令我哋更尷尬。」
文：影視組