江美儀心心眼狂 (目及)小鮮肉
藝人江美儀拍劇「艷福無邊」，先後與黃智賢及關禮傑有感情線外，更有機會現場目測小鮮肉余德丞（Dickson）的「澎湃胸肌」，美儀直認「等咗呢場戲好耐」！對於有報道指她「教」Dickson做戲，美儀大叫「撞邪」，Dickson則坦言：「其實佢（美儀）肯鬧我仲好。」
美儀、Dickson、陳豪、關禮傑及蔡國威等日前到黃竹坑一間國際學校，為無綫新劇《誇世代》拍攝外景。曾是香港游泳代表隊成員的Dickson換上泳褲拍攝一場游水戲，40吋胸肌「原形畢露」，令扮演其母的美儀「少女心」盡現說：「嘩，小鮮肉喎！等咗呢場戲好耐喇！」更作小鳥依人狀與Dickson合照。
冇擺款教做戲
現場所見，「兩母子」相處愉快，難怪當談到有傳美儀擺「阿姐款」教Dickson等人做戲時，Dickson急急澄清：「係我向佢討教嘅，我首次拍劇乜都唔識，佢肯教我真係塞錢入我袋，其實佢肯鬧我仲好呀！美儀姐對我好好，得閒就叫埋我去飲茶。」美儀則笑說：「我啲戲份比較密集啲，一收工就返屋企，點會仲留喺廠教人做戲呀？唔通踏入七月真係猛啲？」待拍畢《誇》劇後，美儀將放3個月假，計劃到訪日本、馬來西亞及澳洲等地。
陳豪預告騷肌
而早前越洋向太太陳茵媺送花的陳豪，不讓Dickson專美，預告稍後亦會「寛衣解帶」拍攝打拳戲，於鏡頭前盡騷辛苦得來的胸肌：「操得差唔多喇，呢段日子多謝張繼聰同我一齊捱，所以即使拍完劇，我都會盡Keep嘅，無謂嘥咗嘛。（越洋送花咁浪漫？）我唔係浪漫嘅人，依家都喺度學緊。所有嘢發自內心嘅，娶咗個咁好嘅老婆，梗係要對佢好啲啦，同埋用行動話俾佢知，老公好錫佢，佢做媽咪好辛苦o架。」陳豪更指很掛念現身處加拿大的囡囡，一家人有計劃年底再去一次旅行享天倫。
文：影視組