伍樂怡學嗲功預告「撒」男友
熱門佳麗伍樂怡（Kelly）前晚到餐廳拍港姐外景，並向台灣女星張瑋純學嗲功，活學活用的她笑言返港會找男友試試：「有啲困難，要去到嗰個情緒，譬如激嬲咗人，要耍冧先至做到。我唔係好嬌嗲嘅女仔，要去到特殊情況先做到。（返港搵男友試撒嬌功力？）張瑋純係好出色嘅撒嬌女仔，都學咗幾招，返去都會試吓，哈哈。」
前日泳衣環節，問Kelly可有獲男友讚賞？她笑說：「冇乜嘢，佢話款式好健康，冇乜comment。」她又稱到台灣拍外景，與佳麗及工作人員加深認識，更與同房的何依婷傾了不少心事，總結旅程不覺辛苦。