美國樂隊Linkin Park（LP）的41歲主音Chester Bennington早前上吊自殺，震驚全球，近日先後傳有三名粉絲不堪偶像離世而自殺，各地粉絲紛紛留言互勉，Chester遺孀Talinda亦呼籲粉絲互撐，捱過傷痛時刻！
Chester於本月20日自殺身亡，英年早逝，令各地粉絲大為哀傷，繼日前在社交網傳有兩名芬蘭粉絲Kris與Melissa Mintz難抵偶像離世而自殺後，前日再有網名為「kmarie8」的Chester粉絲於Reddit討論區的LP專頁表示，同為Chester粉絲的女友人痛心偶像離世，選擇結束生命。
「kmarie8」於留言中未有透露好友身份，僅表示二人同為護士：「我最好嘅朋友，有着相當坎坷嘅人生，佢對Chester離世感到非常難過，昨晚決定了結生命。」她自言感覺內疚、憤怒與痛苦，相當自責，靠睇大家的勉勵說話度過艱難的晚上。她又指好友有兩名仔女，可惜最後仍不敵惡魔：「佢將啲嘢藏於心深處，我冇諗過會咁嚴重。我哋原定聽日出席Chester追思活動，齊齊為他紋身。」不少網友留言慰問，「kmarie8」感謝大家關心，表示將會現身追思活動。三人的自殺傳聞未經證實，但不少Chester的粉絲都大為關注，留言互撐。
而Chester的遺孀Talinda前日亦於社交網悼念亡夫：「一周前嘅今日，我失去咗靈魂伴侶，我嘅小朋友失去咗佢哋嘅英雄、佢哋嘅父親。」Talinda自言會盡力養育仔女，又感謝亡夫粉絲：「我想畀全世界嘅Fans知道，我哋感受到你哋嘅愛同失落。佢係一個光明、充滿愛嘅靈魂，並擁有天使嘅聲音。依家佢已經冇晒痛苦，喺我哋所有人嘅心中唱歌，望上帝保佑我哋，幫助我哋喺痛苦嘅時候搵其他人扶持，Chester會想我哋咁做。」
雖然Chester家人計劃舉行私人葬禮，但亦有為粉絲作悼念安排。LP成員Mike Shinoda前日於社交網列出全球歌迷悼念站，粉絲可於各地聚集。Mike亦列出LP推出的防止自殺網站，另代表全體樂隊成員多謝粉絲於艱難時刻尊重他們的私隱。
文：外娛組