胡諾言激凸裸跑(抓)底底廣告
藝人胡諾言昨日與關楚耀、朱晨麗（朱朱）為無綫新劇《特技人》開工，拍攝一場胡諾言為氹兄弟關楚耀，大庭廣眾下僅穿內褲高舉紙牌「示愛」戲，朱朱則拿住攝錄機追拍！昨日天氣酷熱，氣溫高達36度，眾人熱到身水身汗，朱朱更出動雨傘及風扇來降溫，「裸跑」的胡諾言更儼如水人一般，底褲也幾乎濕透，人前激凸，非常「壯觀」，關楚耀亦不讓胡諾言專美，除掉上衣騷肌，齊齊半裸示人。
關楚耀未叫先除
僅穿底褲裸跑，39歲的胡諾言笑指為螢幕獻出第一次，近日更勤練掌上壓及只吃麥皮充飢，問到可有向太太陳琪備案？他說：「佢冇乜理，但有叫我飲多啲水，同埋小心『小諾言』囉！（有冇做定防走光措施？）冇乜。（你下體激凸喎！）冇乜留意。（有冇加墊？）有嘢加o架咩？塞紙巾？梗係冇啦！」於酷熱天氣下裸跑，胡諾言坦言有苦自己知：「要打赤腳跑步，『辣』到兩隻腳板好熱，好在有朱晨麗萬歲請飲嘢，希望有廣告商睇到我呢場戲，會搵我拍底褲廣告啦！」
早前已率先為該劇拍裸跑戲的關楚耀，坦言知道有裸跑戲份已感興奮：「導演未叫我除衫，我已經除定等啦！」對於半裸猛男在面前跑，朱朱興奮地說：「我好少去海灘，冇乜見男仔裸跑，依家都驚聽日會生眼挑針，仲要一日睇兩件！（有眼福？）佢哋好大隻，身形好Fit。」
文：影視組