張曦雯向馮盈盈挑「機」由頭輸到尾

藝人張曦雯現身「香港動漫電玩節2017」，與馮盈盈比賽打機，結果Kelly戰敗，盈盈則輕鬆到邊玩邊哼歌！Kelly賽後服輸，她說：「呢個遊戲我唔叻，打咗十分鐘，如果再打，應該都輸畀盈盈，今晚我會參加big big channel足球game比賽，我打得唔叻，好多掣要撳，諗住用簡單方法去玩。（驚喺big big channel直播時爆粗？）之前好似試過，但我唔係特登。（有冇懲罰？）我只係留意到啲網友好驚訝咋！（今日性感玩真空？）呢個問題我唔會答！」

唱歌打機防爆粗

盈盈則分享打機不爆粗心得：「我會唱住歌嚟打機，咁就唔驚！我都會打big big channel足球game比賽，聽講麥美恩好勁，我希望唔好遇到佢，我男友有打開足球game，我投其所好，但我唔叻，諗緊好唔好用男友account嚟玩，睇吓可唔可以用到佢啲寶物！」

馮盈盈（右）即場比賽打機，擊敗張曦雯。

陳凱琳（右）與張寶兒現身動漫節。

陳凱琳拍拖打波

另外，藝人陳凱琳及張寶兒昨日出席「myTV SUPER Supreme動漫巡禮」，問到陳凱琳如果要與男友鄭嘉穎玩cosplay，有甚麼心水選擇？她說：「我覺得佢未必會玩。（扮《風雲》步驚雲呢？）咁我扮楚楚，但我把聲唔夠靚。（拍拖打機？）打網球就有，佢用兒童波教我，我話都唔難嘅，但一轉番大人用嘅波，我都係安心做番佢啦啦隊算啦！」而張寶兒對於參選港姐的細妹張寶欣在台北拍攝外景期間爆喊，她說：「我唔驚訝，我哋成家都感情豐富，阿妹可以喺咁多人面前喊，抒發出嚟，好叻！」

文：影視組