陳茵媺翹埋手做女王 陳豪創「摩西密碼」養全家

瓣瓣掂 拍劇廣告賣啡

為頭家要全年無休嘅佢，佢套「摩西密碼」嘅精髓係：多、密、長！貴為無綫最「多產」小生，先講生仔已經No.1，可能飲咖啡零舍強勁，真係變變變生命力，三年內生一對囝囝一個囡囡，生殖爆發力認真強勁過維港匯啲煙花！多繁殖嘅佢，拍劇生產力都一樣唔嘢小，一年都拍番至少兩部，啲人成日話無綫出手低，陳豪拍劇都起碼收五萬蚊一集啦，單係舊年拍三部劇已經執咗接近四百萬！

至於「密」，咪係佢人氣高企密密拍廣告同代言囉！講入屋，陳豪嘅滲透率真係好驚人，入油、上網、信用卡、月餅、中藥、植髮，講得出嘅產品代言或活動，八成都有佢份，出個活動坐底收十萬，如果加埋老婆孖咇上，冇廿萬都唔使旨意佢哋出現！最食腦係，每次公布生B或咩性別，留番出活動先講，單賣呢個神秘感，個活動價又可再加碼，仲唔識計數？

講到「長」囉喎，咪心邪囉，係指陳豪睇嘢夠「長線」啫！本身喺澳洲讀會計嘅佢，喺圈中有個朵叫「有米豪」，唔少藝人見親佢，開口唔係傾樓市就係傾股市，就係因為佢夠穩陣！唔單止咁，都話佢係娛樂圈精算師，將興趣化為事業，睇嘢零舍長線！早兩年佢花近千萬打造咖啡王國，唔係掛住自己個嘜頭玩明星效應開吓舖賣咖啡咁簡單，係直頭做生產線搞實業，仲會一條龍服務幫人搞咖啡店或做埋產品設計！咁高瞻遠矚，分分鐘可以搞到上市做埋咖啡CEO！

講冧女 馬國明未夠班

當年有「首席筍盤」之稱嘅陳豪，風靡萬千師奶少女心，單睇被舊愛廖碧兒狠撇，都要繼續為對方講好話，男女老少個個畀Like！好多人話馬國明係繼承者們筍盤二號，但講冧女，Nuts哥就覺得馬國明仲未夠班。太太陳茵媺以前好有野心向視后寶座出發，但佢生完咁多胎未收身，明顯撲熄埋視后團火，皆因陳豪做到足當女王咁服侍！陳豪話一生嘅夢想，就係完成陳茵媺嘅夢想，齋講賣口乖已經贏晒，平時出街唔理形象做湊仔公，又幫老婆孭埋手袋周街行，結婚周年玩二人世界去半島開房宿一宵，以上咁貼地行為唔係個個男人做到。好多人話，女人有附屬卡任碌，代表男人嘅萬千寵愛在一身，查實有錢任使之餘，對方當正自己係女神咁拜，先至最幸福。你係女人，識揀嘅，一定揀陳豪啦！

Nuts哥