前英國男子組合Take That的43歲成員Robbie Williams，曾受體重問題困擾，日前更自爆一年多前患上「夜間睡眠相關飲食失調症」，瞓覺時會無意識起床進食，令減磅難上加難！
Robbie過去一直為身形問題煩惱，雖然曾成功操肌變大隻佬，但亦試過令腹肌「六合一」變大肚腩，被傳媒嘲笑發脹！原來Robbie要Keep住大隻真係唔容易，事關他年多前患上怪病，瞓瞓吓覺都會無意識起身食嘢，做Gym都冇用！
Robbie日前在網誌上載影片，自爆患「夜間睡眠相關飲食失調症」（Nocturnal Sleep-related Eating Disorder），他說：「我一年多前有一個怪病，就係我會夜晚食嘢。我嗰時係瞓緊覺，然後我會起身去食嘢。我唔係有目的咁去做，完全係不自覺嘅，但就會咁發生，呢個奇怪情況至今已發生超過一年多。」最慘的是，Robbie吃的不是健康食物：「好明顯我瞓緊時唔會想食蔬菜，而係會想攝取好多糖分，會食通心粉、芝士同搽滿花生醬嘅曲奇。」難怪太太Ayda Field爆Robbie需要調節日間飲食。
據知，大概有2%的人患有「夜間睡眠相關飲食失調症」，此病容易引致糖尿病與體重增加等健康問題，需要到有監察腦部活動的特別睡眠醫療室進行治療。
文：外娛組