劉偉強完成「大業」流男兒淚

劉偉強執導新片《建軍大業》出動54位內地著名演員參與演出，位位演技了得，角色造型更幾可亂真。有別於以往的歷史電影製作，劉導不諱言今次注入了商業元素，希望為觀眾帶來驚喜：「投資方搵我傾，我即刻話：『點解咁大膽搵我拍？知我得咩？』其實荷里活拍過好多歷史大片，人哋就拍得好重電影感，所以我喺呢方面真係花多咗心思，即使文戲都拍出壓迫感同張力。」過往類似題材的電影很難打入香港市場，但劉導卻唱反調，連日來獨自在港宣傳，希望大家自發性走進戲院欣賞其心血。

朱亞文趕極唔走

談到戲中扮演周恩來的朱亞文及扮演毛澤東的劉燁，劉導說：「5、6年前劉燁已經演過毛澤東，起初大家都好難想像佢嘅造型，我就畫咗佢個樣配落毛澤東肖像，結果出奇地配合。今次佢嘅演出比起5、6年前更見氣度。至於朱亞文有樣嘢令我好難忘，佢嘅投入度係百分百，呢個演員即使冇佢嘅戲份都留喺度『跟場』，捉住你討論演出同劇情，點趕都唔走﹗」

劉偉強坦言拍攝時遇上不少困難，全靠台前幕後合力，才能將不可能的任務完成。	劉燁於《建》片飾演毛澤東。	朱亞文（左）被導演讚拍攝時百分百投入。

全場眼濕濕

與近千個台前幕後合作了4個多月、拍足70多組，加上拍攝時遇到的種種困難，彼此已建立難以形容的深厚友誼。感性的劉導談起煞科宴情況時坦言：「當時大家飲咗兩杯，我剪咗少少片畀大家睇，我哋覺得完成咗一次不可能嘅任務、打咗場好漂亮嘅仗，我真係忍唔住喊咗出嚟，結果大家都眼濕濕。」

文：影視組

攝：劉智源