麥明詩感激包容：唔會污染大家好耐

「十優港姐」麥明詩去年拍攝的處女劇《賭城群英會》正在熱播，新人來說表現合格。麥明詩緊張又期待，望能改進表現，她說：「自己最介意用咗錯嘅演繹方法一路錯落去，拍攝頭幾日好緊張，講句對白好似背書咁，最簡單走位都行錯，有時又遮咗自己塊面，不過都算學得快，好多謝大家嘅包容。自己戲份唔算多，就算做得好乞人憎，都唔會污染大家眼球好耐，唔會成日見到我，大家會舒服啲，哈哈。」

問阿佘攞貼士

麥明詩認為拍攝《賭》劇最可惜是未能與「師姐」佘詩曼有對手戲，但亦有偷師及攞貼士，她說：「自己好鍾意阿佘嘅《天與地》同《使徒行者》，有問佢有乜貼士，佢第一句就叫我放鬆，同埋融入劇本世界，但放鬆都唔係咁易做到。睇阿佘做戲好自然，平衡得好好，自己可能要幾年時間先掌握到。」麥明詩坦言會以阿佘為目標，希望接拍一部感動人心的作品。

麥明詩與何浩文在劇中演情侶，更因而傳緋聞。

麥明詩自言首次拍劇難免緊張，未學懂放鬆。

錫錫戲冇尷尬

麥明詩首次拍劇就與何浩文有錫錫戲，雖然是蜻蜓點水，但始終都是「第一次」，拍劇期間更傳出緋聞，她說：「自己讀書可以好專注，將專注用番落拍劇，所以拍嗰陣都冇尷尬。」麥明詩又感謝公司及監製王晶起用，她說：「晶哥話覺得我好大膽所以搵我，可能做演員起碼要有膽去試啦。」

文：影視組

攝：唐豁莊