林慕德自嘆失敗：累我破產咁滯！

重提與蘇永康反目一事，林慕德（Mahmood）強調與錢銀無關，只是當時自己未夠成熟：「我乜嘢都唔鍾意，啲人覺得我好似玩嘢，當時我有啲唔開心，點解我冇機會做到啲好似寶麗金咁叻嘅嘢？好遺憾冇乜機會同張學友合作。」為製作一張媲美張學友水平的專輯，Mahmood選擇當年只得19歲的蘇永康：「我做嘢唔講錢，所以個預算愈做愈大。佢唱歌有天分，但咬字欠咗啲嘢。我冇乜系統咁叫佢不停練，又冇解釋淨係叫佢唱。佢當時唔開心，我又唔開心，變咗大家有個誤會仲加深咗。」

得罪客人 被誤會玩嘢

兩人為首張大碟《失眠》出現很多練習與選曲上的爭拗，令Mahmood心灰意冷：「原來做唱片咁慘，當時我已經失敗咗，得罪晒啲客。我本來做音樂創作公司，但突然做咗唱片公司，就冇晒啲客。同埋我用咗太多心機、時間做蘇永康隻碟，忽略啲廣告客，《失眠》累到我破產咁滯！不過人哋唔會咁睇，淨係話『你拖我咁耐』、『你玩我呀』、『點解第二隻碟做得咁差？』佢哋冇睇到我已經冇晒心機、冇晒錢、冇晒面！我做咗隻好似張學友咁好嘅唱片，咁又點呢？做人同做生意失敗咗。」

J.Arie享受日日OT

尊稱Mahmood為林老師的J.Arie讚對方的作品出色，很開心成為欣賞會的嘉賓。提到家人為其工作繁忙而心痛，她卻樂在其中：「我做完成日嘢返屋企，唔係好出聲又冇乜表情，佢哋就覺得我唔開心，其實我只係想把聲抖吓，但我係享受嘅。」問到樂手男友是否同樣心痛？她即避談指很多朋友都心痛，還勸她正正經經做一份工：「我呢份唔正經咩？啲朋友呻成日唔開心同要OT，至少我OT得開心，唔介意日日都OT！」又解釋不想戀情成焦點：「我平時出街已經戴晒口罩，擺明唔想畀人見到！拍拖好正常啫！」

林慕德與蘇永康因練習與選曲上有爭拗，出碟變反目。（黑白圖片）

J.Arie享受忙碌工作，林慕德要畀多啲歌佢唱先得！

文：音樂組

攝：吳文聰

林慕德髮型及化妝：Nikki Sun @ MAKE UP FOR EVER ACADEMY HK

J.Arie髮型：Kenki @ Queen's Private I

J.Arie化妝：Pinky @ Jessicachan make-up

場地：圃鍋