王卓淇密實輸蝕遭陳婉衡搶「峰」頭

一連五日的「2017第十九屆香港動漫電玩節」將於本月28日假灣仔會展舉行。王卓淇、林泳淘（Wingto）昨日到九龍塘出席記者會，同場還有「港男」胡（非玉）及藝人余應彤。去年擔任「動漫女神」的無綫「咪神」陳婉衡（Alycia），今年獲遊戲機品牌邀請，以性感女車手造型現身，力谷上圍又晒腰，「峰」頭蓋過兩位密實「動漫女神」王卓淇及林泳淘。

「唔一定要性感」

三人受訪時表示有打機習慣，Alycia被問到服飾較王卓淇和林泳淘性感，她稱服裝由品牌提供。她透露之前已與該品牌合作，平時都有打遊戲機，但只限網上作賽，她笑說：「好彩唔係揸真車，好驚有意外，因為有好多嘢都顧及唔到。試過玩賽車遊戲揸得慢畀人鬧。」而王卓淇和林泳淘表示稍後會以同樣的服飾出席動漫節活動，並說：「唔一定要性感。」

想同粉絲打機對戰

王卓淇表示打機有不錯的成績，更試過獲得最高分數，但笑言暑假應該有好多學生同時打網上遊戲，好難再勝出，有機會或會與粉絲對戰。而林泳淘則透露早前為動漫節拍攝宣傳片的動作場面，搞到腰痠骨痛。

文：影視組