Oscar遮風擋雨江若琳甜蜜掃胸
歌手江若琳（Elanne）自公開與「生煎包王」蕭潤邦（Oscar）相戀後，不時孖住出席朋友聚會，又頻頻公開網上放閃，「愛女成癡」的Oscar更在左手腕紋上女友英文名「E」字。曾是組合Bliss成員的Oscar近年轉戰飲食界，先後開設多間「生煎包」店，近月在大埔及銅鑼灣連開兩間分店，榮升「老闆娘」的Elanne日前孖住男友巡視業務，雖然遇上黃色暴雨，但並無影響一對小情人拍拖巡舖。
記者日前在大埔巧遇Elanne及Oscar，當時橫風橫雨，只見兩人一把遮兩份用，由於Elanne穿上厚底鞋，體貼的Oscar為免女友跣倒及下身被雨淋濕，不停以自己身軀擋雨，又十指緊扣拖到實十分恩愛！Elanne入到舖內，在眾目睽睽下徒手在男友胸口掃走雨水，氹得Oscar十分開心，更肉緊得「搣面珠」回禮，當眾晒愛！Elanne出現，很快就被食客認出成為集郵目標，有求必應的她逐一與街坊合照，最後更放下藝人及「老闆娘」身份，在店內落手落腳幫手送餐。
