再擲百萬豪裝 筱靖餐廳重生落街拉客
筱靖有份投資的餐廳早前因帳目糾紛問題倒閉，令其七位數字投資付諸流水！不過近日她收拾心情後，再擲百萬在原址重新出發！除親身落街派傳單外，筱靖更落手落腳做樓面侍應捧餐冧客仔，非常落力！
前亞姐筱靖有份投資的西餐廳早前因出現帳目糾紛問題，令她七位數字的投資凍過水之餘，更搞到餐廳清盤倒閉。最近，筱靖收拾心情後在原址重新出發，除以自己洋名為餐廳重新命名外，亦再擲重金裝修樓面及廚房，望令餐廳浴火重生！
餐廳試業的個多星期中，筱靖不但親身落街派傳單，更落手落腳到樓面做侍應冧客。她在訪問中坦言餐廳人流大不如前，要從頭開始儲熟客：「好彩附近有好多Office，好多街坊都知我重新開業。」問到今次重整旗鼓花費多少？獨資經營的她即謂：「都七位數，好多嘢要重新pick up番，之前好多甩漏。」
被索15萬否則拆爐頭
提到早前的帳目糾紛，筱靖表示已統統解決，但重整旗鼓期間曾有人要求收取15萬，否則會拆除餐廳內包括爐頭等生財工具：「之前有啲嘢未搞掂晒，所以唔入得舖頭，好感激員工喺冇冷氣嘅走廊留守，用條好粗嘅鏈鎖實道門。樓上餐廳老闆都好幫手，幫眼睇住會唔會有人爆門。」問到有否諗過何時能夠回本？她即謂現階段只想盡力做好盤生意：「我有一班好錫我嘅員工，點都會撐落去，回唔回到本、搵唔搵得番之前舊錢，呢啲都係後話。」
文：影視組