蕭正楠意外頭落地 曹永廉憂翠如終身幸福
藝人蕭正楠（阿蕭）與曹永廉（阿廉）主演新劇首集創收視佳績，台前幕後飲得杯落。拍攝期間阿蕭吊威吔發生意外，頭部先落在地上軟墊，嚇壞全場，相關照片終於曝光！當日「全程直擊」兼幫手拍片向黃翠如報平安的阿廉，搞笑指未有擔心老友生殖能力受影響：「佢都冇乜啦！」
蕭正楠、曹永廉與何廣沛主演的無綫新劇《超時空男臣》前晚播出第一集，錄得平均收視25點、最高27點，吸納175萬人次追看，暫時成為本年度首播劇集的最高收視紀錄。劇中扮演明朝將軍袁崇煥的阿蕭不乏拳腳功夫，首集已在鬧市「凌空疾走」，原來拍攝過程相當「玩命」，據悉今晚播出的一場戲交代阿蕭為搵快錢，當替身化女妝吊威吔於3樓跳下來，拍攝時因風向改變等原因，令他整個人倒轉，頭部先落在地上軟墊，令工作人員嚇呆！
「瞓喺度郁都郁唔到」
身為好兄弟的阿廉見狀即掏出手機拍下過程，第一時間向阿蕭女友翠如報平安，相關照片終曝光！阿廉笑說：「當時一睇已知有問題，我呆一呆，見咁多人圍過去，我就唔阻住救人啦！見到佢瞓喺度郁都郁唔到，後嚟大家扶佢埋一邊休息，又幫佢搽油，大約半小時後先見佢OK番，後來佢同我講話聽到啲骨『咯咯聲』。」阿廉稱事後有捉阿蕭去做全身檢查：「都幾十歲要Keep住（檢查），我唔係擔心佢，係擔心翠如嘅終身幸福啫！（整到脊椎會唔會影響生育能力？）呢層我唔擔心，佢都冇乜啦！我反而啤咗兩件（小朋友）。」他又大讚阿蕭今次演出相當用心兼落力，寄望對方於台慶頒獎禮上「有回報」。
阿廉咀何廣沛
而阿廉亦不讓阿蕭搶鏡，事關稍後劇情將交代他出手幫何廣沛擊退追求者，更會「犧牲色相」上演一幕激吻。談到咀男生，阿廉說：「都唔係第一次，我咀過黎耀祥，感覺真係有啲怪，好彩我同王君馨都有咀戲。」除了收視報捷外，阿廉坦言近日工作不絕，十月自己生日及太太生日都不能留港慶祝：「要出埠登台，有嘢做已經好感恩。」另外，阿廉在社交網上載阿蕭被工作人員拿着風扇吹下體的相片，並留言：「蕭仔好熱咩？小心凍親。」
文：影視組