美國天后Katy Perry日前夥拍澳洲百貨公司推出新廣告谷澳洲巡唱，臨尾想搞笑叫愛犬Nugget去追樹熊，但被炮轟教壞大眾，隨時令澳洲每年約110隻樹熊被狗咬死的問題惡化！
天后Katy Perry日前與澳洲百貨公司合作推出新廣告，順便宣傳明年於澳洲舉行的巡迴騷，不過廣告尾段就惹來批評，事關Katy最後「口多多」叫愛犬Nugget去追樹熊，令不少愛護動物人士扯火！因為澳洲每年有約110隻樹熊被狗咬死，只剩下約4.3萬隻野生樹熊，令人關注保育樹熊問題。
獸醫Claire Madden看過廣告後，受訪時公開批評Katy：「佢同百貨公司完全係無知，喺好多唔同層面上都有欠恰當。由於Katy係年輕人嘅榜樣，佢今次完全係破壞晒我哋一直對外推廣、呼籲大眾唔好畀狗隻同樹熊接觸嘅工作。」
Claire其後向Katy「挑機」：「你嚟跟我一日，親身了解點解你嘅言論唔應該喺全國播出。狗係樹熊最大嘅威脅之一，你如果嚟搵我，好快就會知樹熊有幾可愛同珍貴、你嘅言論有幾不堪！」事後百貨公司的發言人亦有回應事件：「我們留意到廣告相關的回應……現正刪除片中有關樹熊的內容。」
文：外娛組