李旻芳瘦身不瘦胸挑戰泳衣騷
今個夏天想盡情騷Body？擁有弗爆身形的藝人李旻芳（Lucy），即席教授消脂健身動作，更大方分享瘦身不瘦胸的秘笈。此外，Lucy自爆有意挑戰泳衣騷，於夏日大派福利。
夏日炎炎，少不免着比堅尼玩水消暑，相信女士們正為身上贅肉而煩惱。藝人李旻芳（Lucy）不時要在鏡頭前展示苗條身材，故對減肥甚有心得，日前她孖靚仔教練Calvin教大家踢走肥膏！Lucy所示範的健身動作，專門針對最難減的大腿及肚腩位置：「只要每日抽少少時間做呢幾個動作，每個動作做15至20下，然後再重複做4次，加上控制飲食雙管齊下，自然成功消脂，仲會練到靚嘅肌肉線條。」
男友冇詐型
減肥大忌當然是瘦胸不瘦身，女士們最驚減到上圍縮水，Lucy直言亦有此憂慮：「我都驚減到過瘦，會減咗啲唔應該減嘅地方，所以寧願自己有啲肉地，睇落比較健康同吸引。好彩自己有骨嘅地方都有骨，有肉嘅地方都有肉，身形都算應有則有，哈哈。」她又公開美胸心得，只要配合正確的按摩手法，每晚勤於按摩胸部，即可Keep住澎湃上圍。
講到有不少泳裝品牌陸續舉行泳衣騷，Lucy表示不介意擔任模特兒行騷，又稱男友黃耀英思想開通，即使她性感示人亦絕不詐型：「因為佢喺外國返嚟，份人比較開通，佢會明白只係工作需要，好似我有時拍劇會有親熱戲，佢都唔會介意，仲好放心畀我拍，好少嚟探班監場。」
文：專案組
攝：林蔚恩
教練：Calvin Au Yeung@ClassicCal Fitness