張彥博激光矯視眨吓眼盲咗！
演慣靚仔的藝人張彥博（Bob）近日在劇集挑戰飾演智商有障礙人士，以特厚眼鏡示人的他自爆早年曾做激光矯視，但手術後右眼突然刺痛兼「失明」，當時他曾作最壞打算做「半盲俠」過日子！
藝人張彥博（Bob）過往在劇集中扮演不少學生及靚仔角色，近日在新劇《踩過界》中拋開靚仔形象，扮演一個智商有障礙的角色。他表示事前在造型上花了不少心思，希望可以突出角色：「今次呢個造型設定比較薯，監製同導演都同我傾過，要撇甩我嗰種靚仔感覺。眼鏡方面我本身帶咗好多畀監製去試，但監製嫌太可愛，因為個角色係智力有障礙嘅。其實我拍嗰陣，副眼鏡係成日跌落嚟，因為真係好厚，鏡片仲要係用玻璃做。」
右眼突痛 睇嘢好矇
講起眼鏡，Bob幕前不時以眼鏡Look示人，原來平時亦備有多款眼鏡框配襯衣服，多年前則進行激光矯視，還自爆手術後右眼差點盲，憶述當時情況仍有餘悸：「本身有三百幾度近視同散光，已經早喺七、八年前做。激光矯視都算係一個輕微嘅手術，但我做完之後係一隻眼睇到嘢，一隻眼睇唔到嘢！雖然做完睇嘢會矇矇哋，醫生嗰陣同我講話係正常，但我返到屋企休息緊嗰陣，右眼突然痛痛哋兼好矇，我就開始好驚，拿拿聲返去再睇醫生。醫生話我個蓋（指角膜）郁咗，可能隻眼太大，眨眼郁咗，醫生最後幫我整番就冇事。嗰段時間我睇唔到嘢，真係好驚，但好感恩我媽媽一直陪伴我。（有冇作最壞打算？）有呀，諗過盲一半囉！」
文：專案組
攝影：張福宏
場地：牧羊少年咖啡．茶．酒館
髮型：Deep Yu@Beijing Hair Culture