阮頌揚畀香茅考起劈極唔開
影壇新人阮頌揚擔正做男主角的電影快將上映，平時鮮有下廚的他今次為《星級煮意～鍾菜．鍾廚》做「煮角」賀一賀，介紹一道「香茅豬扒」。期間雖被「硬蹦蹦」的香茅考起，但最後克服困難完成任務。
雖然出道日子尚短，但可塑性高的阮頌揚（Brian）已工作不斷，除了擔演新片《我們的6E班》的男主角外，早前又演出Twins的MV任男主角。Brian今次自我挑戰，為東網巨星新節目《星級煮意～鍾菜．鍾廚》獻出螢幕第一次，煮番味「香茅豬扒」。
平時雖甚少下廚，但醃豬扒、整葱粒都難不到Brian，但當遇上「硬蹦蹦」的香茅時卻即時「投降」，他用盡力切、大力斬仍未能切開香茅，最後由高人指點後才將香茅「制服」！
最愛媽媽的味道
煮餸過程有點蝦碌，但原來Brian揀這味餸是相當有意思，他說：「呢個餸都算易整，同埋喺中學家政堂做過，所以攞出嚟同大家分享。書籍都有提過香茅可以幫助去頭風、去風濕、通經絡，係一種有益嘅食物。」
談到最喜歡的食物，Brian表示所有母親所煮的都喜歡：「以前唔覺好好味，但近年經常內地做嘢，一去就幾個月，會掛住媽咪煮嘅嘢食，因為食咗廿幾年，冇得食就會諗起媽媽嘅味道。」
「鍾菜．鍾廚」邦師傅教路，指有方法處理豬扒及香茅：「如果要豬扒鬆軟，可以先用刀背拍鬆再醃。至於香茅本身好硬，可以先將佢拍鬆再切，又或者將香茅同水放入攪拌機打成汁，以汁醃豬扒會更入味！」
《星級煮意》由數十紅星、名人親身示範各種不同菜式，包括陶大宇、杜汶澤、陳嘉桓、陸浩明與女友陳詩欣、周嘉莉及黃建東等，節目逢星期一及四更新，大家可透過東網app及東網網頁收看及重溫。
文：影視組
場地：鍾廚（時代廣場1201舖）
髮型：Tin Ngai@Hair Corner（中環）
化妝：Fion Ai