展鵬維護發福單文柔澄清未有B

無綫逾60位藝員包括陳展鵬、田蕊妮、曹永廉、陳山聰、姚子羚、黃智雯、朱晨麗、陳庭欣、譚凱琪、張振朗、李家鼎、譚玉瑛、沈卓盈、麥明詩、劉佩玥及鄧佩儀等，在將軍澳電視城出席「TVB Amazing Summer」記者會，席上介紹暑假新節目，包括劇集《超時空男臣》、《同盟》、節目《3日2夜》、《#後生仔傾吓偈》、《阿爺廚房》、《瘋狂夏水禮2017》、《扛工捱世界II》、《Big Big 小明星》及《一起跑過的日子》等。

冇咁快結婚

緋聞情侶陳展鵬與Phoebe首次在公開場合大方合照，莫非有意公開戀情？展鵬笑說：「唔係，之前都好大方，大家唔好咁負面，上次係因為趕住出去做嘢啫，希望大家多啲正能量。（公開拍拖？）唔係公唔公開咁小兒科，有報道講到話佢已經大肚，今日個肚呢？冇咗嘅？唔係去咗醫院做手術吖嘛！」再追問二人是否男女朋友關係？展鵬說：「佢之前話了解中，我就話認識中，最近又話佢大肚中，究竟真係大肚定係假大肚先，即係假嘅。（咁係咪拍拖？）畀啲空間大家去諗吓啦！（結婚先公開？）咁快去到結婚？」

展鵬與單文柔受訪期間不時相視而笑，甜到呢！	田蕊妮（中）帶隊宣傳新劇。	吳業坤又撩女仔喇！今次對象係鄧佩儀。

直認見埋家長

有愛情滋潤而發福的Phoebe笑言要減肥：「嗰日唔係咁舒服，影出嚟好似大肚咁，其實真係肥咗。（見過伯母？）有。」旁邊的展鵬即搶答：「我阿媽好和藹可親，大部分同事都識得我阿媽。（拍拖係咪唔會公開？）我一向唔想將私人事放喺工作上面，希望大家多啲留意我嘅工作，尤其佢係新人，太多花邊新聞唔好，又幫唔到佢搵食。（好保護佢？）佢唔使我保護啦！（地下情？）冇諗，地下情、宇宙情都好，都係娛樂一則，畀啲空間大家聯想吓。」Phoebe亦表示沒有考慮地下情問題，最重要相處舒服及尊重大家意願。

文：影視組