林峯天生愛情狂使錢無上限 千語反常碌到冇高潮

其實「峯語戀」傳分手都傳咗N次，分手原因不外乎話林峯頂唔順吳千語拜金！對於呢個「拜金」標籤，千語何止百辭莫辯，直頭千言萬語無從說起！鬼叫林峯喺拍拖初期，已經密集式同千語BB拍拖遊遍東京、沖繩、大阪、米蘭咩！仲要送名牌袋，出埋七人車加司機管接管送，好似倒模《格雷的五十道色戒》入面個有錢佬豪追廿零歲安娜咁嘅玩法，咁窮家女安娜實會被人話貪錢o架喎！

要乜有乜開壞個頭

林峯冇錯係家底厚，返內地拍劇閒閒哋搵3千萬人仔，要衣食住行一條龍全天候360照起女友，綽綽有餘，亦吹佢唔脹，但就間接搞到千語好似個好食懶做、不事生產嘅廢青咁，唔好忘記，千語曾被踢爆聲稱留學澳洲，其實係出身沙田大圍嘅低分會考生，家底亦唔係特別有！雖然話愛情無分等級，「笑聲，笑聲，滿載溫馨」，王子同灰姑娘都可以有真情在，但林峯話晒係「廈門富商」之子，網友點睇一下子飛上枝頭嘅千語呀？就連林峯阿爸同細佬都被傳唔妥「峯語戀」，點解千語得唔到未來老爺同叔仔嘅祝福？咪就係阿峯拍拖初期，開錯咗個頭囉！

唔係話要千語60歲前都唔好畀飽飯佢食，只係可唔可以效法吓天王郭富城、黎明咁，寧被人知，都唔好直認，要收收埋埋，直到結婚至算！點知林峯就別樹一幟，唔只喺記者面前認愛千語BB，仲講足七次「好愛」，棟篤男神黃子華講過：「唔好同我講愛，做啦！」雖然林峯都講得出、做得到，錫到千語燶，陪行街、陪放狗，連狗屎都執埋，但點解外國有句說話叫「Love is Shit」？因為兩者某程度幾似，試諗吓，當你連講七次「我執你」，唔好話人，連舊屎都覺得你肉麻！

深閨宅女愛打機

雖然千語只得23歲女，但曾經為老友馬天佑小便睇水嘅佢，好歹都叫做見過大蛇屙尿，點會坐以待斃，任網友狂砌咁被動？以前成日被人影到出入名店嘅佢，近排就一反常態，低碳減排，約埋朋友行公園，一派「今天起要早睡早起，多啲蔬菜，飲多啲水」嘅life style，真係差啲誤會咗佢男友係林一峰添呀！

但公園都唔能夠「7x24」咁行法o架！林峯又成日返內地拍劇，悶起上嚟，點算呀？難怪千語被人影到落灣仔電腦商場買PS4，連呢期熱炒嘅家用、手提兩用機Switch都唔揀，就係等自己冇藉口拎部機出街打，一於困住自己喺屋企做宅女，雖然話有傳林峯打算明年同千語低調結婚啫，但冇嘢係坐定粒六嘅，一日未結婚，就好似玩《百萬富翁》未過保險線咁，若果因為怕悶走出街，結果又被影到同男士買家具，節外生枝就無謂啦！

Nuts哥