新歡舊愛無芥蒂 馬國明做黃心穎背後男人
馬國明和黃心穎戀情剛撻着，最近二人在橫店為無綫新劇開工，造就他倆日對夜對培養感情，即使面對前度胡定欣，為壽星仔韋家雄賀壽時三人亦全無芥蒂，玩埋一齊。而麥玲玲應監製梅小青之邀參演，愛晒行頭的她更倒貼幾萬元到場開工。
藝人馬國明、黃心穎情苗初種，正好遇上無綫重頭劇《宮心計2深宮計》將二人拉埋一起在橫店開工，日對夜對，令這段戀情茁壯成長，心穎更在微博上載大班藝人煞科宴的相片，順道為壽星仔韋家雄慶祝生日！
定欣心穎好Friend
相中只見馬明與心穎黐到實，馬明前度胡定欣更與心穎並排而企，新歡舊愛企埋一齊未見尷尬，另一張相心穎和定欣齊齊搽Cream落壽星仔塊面，定欣另一隻手還搭住心穎，至於馬明則做心穎「背後的男人」，站在心穎身後傻笑，足見三人毫無芥蒂！心穎並留言說：「娛樂組組長、家雄、快樂生辰，恭喜殺青！」
麥玲玲倒貼拍劇
《深》劇除了馬明、定欣和心穎外，還有不少外援演員，包括周秀娜、劉心悠、羅霖及張慧儀等，臨近煞科，監製梅小青卻增添玄學家麥玲玲加入演出「金夫人」一角，玲玲名副其實多金多銀，她笑言倒貼來橫店開工，客串一場戲：「我哋一行四人，私人化妝師，又有助手，所以我哋自己再租酒店，同補買機票。（倒貼？）幾萬蚊啫，係自己要多人跟去，唔關無綫事，亦唔想打亂無綫條數，咪當玩吓囉！」身材一向「有料到」的玲玲，其古裝造型未見有谷胸效果，她笑言要做手腳：「小青姐好滿意，我都好有驚喜，好靚！（戲服、頭飾重嗎？）其實改良咗，髮髻物料輕咗好多，但我化妝連着衫都用咗三個鐘，但拍攝時好好玩，係呢度橫店熱咗啲啫！」
文：影視組