林敏驄又摑阿Bob：佢冇本錢嬲
藝人林敏驄、雨僑和陳詩慧等昨日為電影《西謊極落之太爆太子太空艙》接受林盛斌（Bob）與范振鋒主持的無綫節目《兄弟幫》訪問。阿驄早前上節目宣傳演唱會時連番摑阿Bob，又指他遲到，節目火藥味濃。
阿驄指沒想到反應如此強烈：「我只係醒咗阿Bob幾下，網民一致讚好，全城都X佢，鬧佢仲多過李思捷，真係大快人心，為民除害。今次佢曉閃避同還拖，但都中咗佢三下。（陳國峰怕咗你？）我都唔知佢係乜水，佢嗰樣我都唔記得。」（有冇興趣同阿Bob一齊做主持？）冇興趣，我周身都唔得閒。不過佢幾適合做下靶位，打佢幾痛快，我都好耐冇喺電視打人，上次係同志偉一齊打安德尊。（阿Bob嬲？）佢冇本錢嬲，呢行最緊要玩得，大家咁熟先玩得咁癲，又唔見我打陳國峰。」
阿Bob繼續被阿驄狙擊，他笑說：「已經好努力咁避，但都避唔到，我都有還擊o架，不過佢閃得好快。其實都係為咗節目效果，同阿驄好friend，唔會有hard feeling，但要澄清我冇遲到，做嘢一向準時。」
