吳業坤心口瘀晒 呻麥明詩拳拳到肉
容祖兒和吳業坤等昨日出席活動，坤坤大爆拍劇時被麥明詩打瘀心口，他更拉低恤衫展示瘀傷，表示過了一星期仍未退瘀，可見麥明詩認真重手！祖兒則透露見證好友盧凱彤與同性伴侶余靜萍的戀情，對於兩人已婚感高興！
天后容祖兒、張敬軒和吳業坤（坤坤）等出席音樂會演出，提到坤坤日前與「十優港姐」麥明詩趁拍劇空檔一起玩直播時，居然請麥明詩食檸檬，指對方不是他杯茶，受訪時，坤坤表示此舉是為免害麥明詩成為他的緋聞女友，又坦言大家未算太了解：「我哋嘅場口唔過10場，唔算好了解，了解咗都唔會，我啲頭髮唔夠亂嘛，同埋佢事業為重，我都係。」
麥明詩：佢胸口厚
坤坤之前在社交網上載心口有瘀傷的相，原來「兇手」正是麥明詩，他即場解開及拉低恤衫，讓大家看他心口的傷勢：「我第一次拍劇受傷，已經傷咗成個星期，嗰場戲講佢失戀，搵我發洩，又要拍幾個角度，佢就拳拳有力。」問到可有向麥明詩索償醫藥費？他就叫大家幫他追討。
打到坤坤胸口瘀了大片的「兇手」麥明詩昨受訪時笑說：「見佢胸口咁厚應該OK，可能佢濕毒，揼兩嘢出晒啲痧，佢又冇話痛，跟住嗰幾take咪用番嗰個力度，不過之後我有請佢食幾日早餐。」
祖兒見證好友戀情
而祖兒剛去完台灣擔任金曲獎的頒獎嘉賓，提到好友盧凱彤（Ellen）得獎時在台上出櫃兼自爆已婚，祖兒坦言當晚才知對方已婚的好消息，又指曾與Ellen的太太余靜萍（小余）合作：「其實小余有幫我拍過CD Cover同MV，我哋好早已經識，小余幫我拍嘢嘅時候，Ellen都有嚟探班，我都有見證佢哋嘅發展，知佢哋經歷咗好多嘢，好戥佢哋開心！」
同場的軒仔與Ellen同期出道，兩人亦曾是街坊街里，他表示相信Ellen踏入人生另一階段，音樂作品會愈來愈好。另外，軒仔向來將粉絲當朋友，不時在網上搞笑互窒，他昨日就在社交網寫道有「臭fan屎」指他肥，並搞笑反擊指要向他們落「不瘦降」，與粉絲開個玩笑！
文：音樂組
攝：鄭家俊