許廷鏗計錯數借「根」攣變直

啱啱識行玩跨欄

無疑擁有靚仔外形又係專業人士嘅許廷鏗，一出道就被無綫旗下的星夢（前名叫星煥）力捧，佢同依家忙住湊女嘅吳若希，可以話近乎包攬無綫劇集嘅主題曲及片尾曲嚟唱，堪稱劇集歌王歌后。首首劇集歌三歲到八十歲大媽都識唱，當然人紅就發現有好多選擇擺喺眼前，呢名「牙醫仔」就恃住「人紅歌掂」仲有大把粉絲做後援，以為「許廷鏗」三個字已煉成金漆招牌，打響如意算盤，捨棄一手湊大佢嘅星夢，轉投華納做「一哥」，中國人最忌係「食碗面、反碗底」，一句「唔識飲水思源」真係幾棹忌。

不過，呢個「一哥」並唔係許廷鏗心諗咁易做，以為回復自由身後必定大把唱片公司向佢招手，竟心雄到想自設工作室話晒事，唱片簽畀華納做發行，但搵真錢嘅經理人合約就冇華納份，錢就想自己袋晒，呢個如意算盤又點會打得響，唔係睇低許廷鏗，但你估你係歌神張學友同陳奕迅嘅級數咩？啱啱學識行就以為叻到可以跑110米跨欄，要知道欄王劉翔都有撞欄跌倒時候，玩吊高嚟賣，點知變吊頸自閹，笑死街坊。「放盤」幾個月都無人問津，連華納都畀佢嚇到「龜縮」，好哋哋「揸咪」搞到要着番件牙醫袍，去揸鉗剝牙，幫人洗牙洗咗幾個月，都知道鑊粥煲大咗，柴都燒到「奄奄一息」，呢鋪真係驚到牙關打震，唔想做「無主歌手」，惟有死死氣向華納跪低，先順利登基做「許一哥」。

諗計博無綫「放生」

所以，許廷鏗能圓「一哥夢」全靠攣都拗番直及時轉「基」，即係將夢想「基地」放下，仲唔「跪住去」將經理人合約同唱片約雙手奉上華納咩！有錢大家搵，否則貪字得個貧。Nuts哥覺得好彩佢係讀牙醫唔係做會計師或財爺，佢數口亂晒龍，真係分分鐘被人「燒數簿」o架！當然Nuts哥亦好欣賞佢嘅膽識，喺大台做咗七年「溫室歌王」，誓死跳出井底，想引證自己實力唔唱劇集歌係咪摺得埋，事關離開無綫就「預咗要受」，許廷鏗都諗盡計仔，借華納頭炮歌《根》嚟請罪求饒，話靈感來自「巨聲幫」，似乎想憑歌嚟歌頌舊公司對佢嘅栽培，博無綫「放生」，呢劑想重施故技「攣變直」，可惜想夾硬直番？邊有咁易。

Nuts哥