開腔為女兒攬仔解畫 學友：講Love U等於講拜拜！
近日「歌神」張學友的16歲大女張瑤華（Zoe）疑情竇初開，傳出與外籍靚仔拍拖，在網上晒攬攬照，並留言互「Love」。學友開腔為女兒澄清未有拍拖，大爆女兒對戀事暫未有興趣，至於將來能否接受女婿是外國人？學友無奈地搞笑說：「我都理唔到咁多。」更不必讓他過目，通知他一聲就夠！
學友有女初長成，Zoe被爆與外籍靚仔Mathis有攬攬照，更隔空傳情，互相留言「Love」對方，但最震驚的是Mathis在社交網自爆已婚，「老婆」卻不是Zoe。前晚學友在山西做完巡唱，昨午返抵香港在機場首度開腔回應愛女Zoe戀情，他先多謝大家關心，坦言有向Zoe了解：「嗰個男仔係另一間學校嘅學生，佢喺社交媒體話結婚都係遊戲嚟啫！大家可以想像到佢都係17、8歲，又準備出國升學，佢同阿女係朋友，不過唔係好熟。」而阿女行山舊相是另一個同學，只是行山時撞到。
Zoe唔開心
學友指該外籍男仔既是模特兒，也有設計服裝，在學生界好出名，對於兩人攬攬照互「Love」，他笑說：「之前冇睇，你哋講咗咪睇吓囉，我睇咗張相，l love u我同阿女都成日咁講，佢哋文化上通常係咁，講love u等於講拜拜，冇咩特別。」學友坦言今次事件，是阿女感到困擾才打電話給他，他說：「佢梗係唔開心，佢咁細個覺得係難處理。」至於有否問過Zoe是否拍拖？他說：「有，佢話未有呢個興趣住。（如果佢拍拖你贊唔贊成？）佢哋細個保護佢時就好憎呢件事，但依家都16、7歲，佢真係識朋友，只要正正常常，唔影響學業唔係咩大問題。」問可接受將來有個外籍女婿？他說：「我都理唔到咁多。（叫佢帶畀你過目？）畀我過目冇意思，通知我得啦，知道咗咪算囉！」不過他都會以過來人身份給女兒意見。
開騷台下大打出手
學友承認作為他們下一代的小朋友是有壓力、有困難，因為自己令女兒被關注，但他不想阻止女兒用社交媒體，他亦沒有關注女兒的社交網，不想阿女覺得被監視，他說：「佢覺得影張相都畀人講，佢都有話自己已經好小心喎，影響到其他同學更加唔想，希望大家體諒吓，我希望佢哋健康成長，少啲受關注，發展過程會正常啲，我都有同佢解釋件事，始終佢由細到大都讀國際學校，比較洋化啲，佢啲同學大部分係外國人，習慣咗佢哋文化。」不過學友認為有這件事都好，等阿女知道做娛樂圈壓力好大。Zoe明年完成中學課程，問到會否再送女兒出國？學友表示讓阿女自己決定，對於女兒被指為「翻版舒淇」，學友笑說：「咩都有人講(0架)啦！係冇人話似我啫，激死我。」此外，網上流傳前晚學友開騷時，台下有三名保安不知何故大打出手。
文：音樂組