陳俞希劉秉賓女上男下瑜樂無窮
ViuTV主持陳俞希（Hailey）與劉秉賓（Match）雖然閒時都有做運動，但兩人一試近年頗受靚仔靚女歡迎的雙人瑜伽，即被考起，Match甚至連一個看似簡單的深蹲動作也做不到，幸好經導師Faye悉心指導下，成功重拾自信與個人魅力！
Hailey與Match雖然對瑜伽並不陌生，但要完成雙人瑜伽動作，仍有一定難度，Hailey說：「我冇正式上過瑜伽堂，只係試過去泰國旅行上過一個鐘頭瑜伽班，同埋喺屋企上網睇片跟住做，但頭先喺阿Faye導師指導下，喺Match背脊上做類似掌上壓動作，雖然有一定難度，但感覺幾好玩！挑戰到難度動作，成功感都好大，我會向呢方面努力！不過Match連背對背踎低都做唔到，我真係估唔到，可能佢平時少去踎廁！」
「硬」漢大受打擊
Match對自己手腳有如火柴般「直不甩」也感不解：「我都唔知點解做唔到背對背向下踎嘅動作，睇相以為好易，我平時有做開Gym，都有運動細胞，我以前仲返過一堂瑜伽，但畀導師話我啲筋硬，好打擊！今次阿Faye導師令我增加唔少自信，我會考慮再學番瑜伽！」
導師阿Faye品評兩位瑜伽初哥：「Match有做開Gym，力量幾好，但就有少少寒背，令佢拉唔直個背脊，所以佢做唔到垂直落嗰個動作，佢可以挨住牆，練番大髀同臀部嘅力，其實如果佢筋有事，應該做多啲瑜伽！至於Hailey，佢本身瘦，做瑜伽可以令佢身形再靚啲！」
文：影視組
攝：劉福宏
鳴謝：香港瑜伽協會及Dickson Yoga
導師：Faye Cheung
服裝：Puma（陳俞希）