蘇志威夫婦馬場睇「阿仔」晨操
組合草蜢日前在「520」（普通話諧音我愛你）日子到澳門開騷，好友張智霖夫婦、黃佩霞等捧場。蔡一智在台上送歌給生日的愛女，蘇志威則肉麻放閃冧妻說：「我老婆（劉小慧）都有嚟，要講啲肉麻嘢！我愛你呀！」並率先爆年底將於紅館開騷。
另外，蘇志威夫婦昨晨現身沙田馬場，原來其愛駒「駿王」首次出試大閘。從未作賽的「駿王」去年操練後因嚴重腳患，長時間休養，早前才復操，昨晨由法國騎師杜利萊出試1,200米泥地大閘，起步相當迅速，但仍未確實出賽日期。兩公婆睇晨操甚為着緊，小慧更向「駿王」大叫「加油」，更笑說：「好似睇個仔比賽一樣緊張。」而蘇志威則表示最重要馬匹重拾健康。
