陳松伶天「捱」歌女靠「鐸」翻身
九十年代性感女神有葉玉卿同邱淑貞，講清純又點少得「松松姐姐」陳松伶？好多網友猛讚今年46歲嘅松松個樣冇乜點變，依然夠親切夠入屋，仲講笑話佢食咗防腐劑，個樣同股「娘味」一樣，五十年不變！潮可以當飯食咩？我Nuts哥覺得佢唔係「娘」係薑，仲好似葉問咁好揪！松松姐姐好揪？唔係化？葉問就話一個打十個，但松松由香港走到大陸，每一步都有血有淚，今時今日係內衣老闆娘、開工作室拍劇又唱歌，京港兩地都有磚頭，仲傳佢有三億身家，仲有個細佢八年嘅老公張鐸錫到燶！
契姐反目趕出家門
嗱！Nuts哥我又點會係睇錢咁膚淺？早排喺劇集《全職沒女》飾演多次遇人不淑搞到「多失」成為沒女嘅松松，現實生活中百分百做過沒女，曾經眾叛親離，親情友情同錢乜都冇，走到絕路，仲諗過一了百了去死添！
18歲拍《天涯歌女》一劇成名嘅松松，好似套劇咁慘情，一樣係做歌女成名後，被出賣被當搖錢樹，之後識埋老公齊齊捱。佢15歲參加歌唱比賽攞冠軍，諗住書照讀，點知佢阿媽大發明星夢，逼佢唔讀書拋個身出嚟做星！松松同阿媽點止鬧咗場交，仲冇埋個家，被人打到口腫面腫報晒警搵社工，傷心到投靠契姐，同阿媽斷絕來往！之後松松邊返學邊擔正做女一，同當時未係天王嘅黎明拍劇而爆紅，仲唱埋兒歌成為第一代兒歌天后。拍盡唔少靚仔小生嘅松松非常「旺夫」，但凡合作嘅男演員好似古天樂、鄭伊健等，一拍就紅到今時今日！旺人唔旺自己，昔日落難時投靠嘅契姐成為松松經理人，松松信任、依賴對方嘅程度超乎大家想像，竟然將歷年嚟所有收入全部上繳成為「公款」，好似共產咁，一個搵錢大家使，自己就一蚊私己錢都冇，連物業同戶口都冇佢名！2006年松松爆大鑊，喊爆話契姐唔鍾意佢識咗個女性朋友，用盡方法打壓佢哋交往，松松堅稱唔係同性戀，純粹係好朋友，最後竟然勒令佢執嘢走！當時松松只係執咗幾件底衫褲，全副身家唔夠一千蚊，廿年嚟嘅收入同「親情」化為烏有！
患抑鬱欲了結殘生
成世人流流長，總會遇到啲衰人，遇到衰人先知世間險惡，惟有當衰人係補品囉！畀你成世有人錫，行運行到腳趾尾，幸福到咁真係驚o架！低處未算低，金牌編劇韋家輝(抓)爆頭都寫唔到，當時35歲身無分文灰爆嘅松松，重遇廿年冇見嘅妹妹，同父母不計前事團圓重聚！過往種種唔開心同壓力，令佢舊病復發，發現卵巢生咗個10cm腫瘤，之後仲要面對老父離世，連環打擊恍如打落十八層地獄，搞到有抑鬱兼諗過輕生。幸而天無絕人之路，當時喺大陸發展嘅松松，遇上依家嘅老公張鐸，令佢重拾自信，由地獄返回人間。
遇見阿鐸飯煲有情
松松連自己都冇諗過，呢段「中港婚姻x姊弟戀」竟然係咁成功！開口埋口叫：「松公主」，當正松松凡間天使嘅張鐸，就係欣賞松松性格夠直夠純，情願人欠我我不欠人，乜都冇就從頭嚟過肯捱肯做，就等如唔少港男一樣，成日都想有個陪自己食麥記嘅女友同甘共苦！松松仲係跟得夫人，帶埋個飯煲跟老公去開工，日日煮住家飯。有圖有真相，你想知佢哋有幾恩愛，你睇張鐸成日網晒情侶裝合照就知！有另一半肯同你捱，真係一種福氣！最難得嘅係，好想有下一代嘅松松雪卵同人工受孕都失敗，決定領養殘疾遺孤，將母愛化為愛心，除咗身為獨子嘅張鐸支持，連老爺奶奶都冇嫌棄松松，好到咁，邊度搵？
遭遇堅慘情夠戲劇性，勝在松松肯咬實牙關捱落去，真正係天「捱」歌女！相比起依家嘅新一代，見工要帶阿媽、冇錢買樓怨阿媽、揀男友要有樓先有高潮，負能量指數高過空氣污染指數，松松姐姐嘅故事確係夠勵志，夠晒分攞傑青！
Nuts哥