黃心穎下廚開條件：有家庭先！
緋聞情侶馬國明與黃心穎昨日出席big big channel全球體驗發布會，忙於拍攝的馬國明以《宮心計2深宮計》造型亮相，提到新App賣點之一是粉絲可以與藝人合唱，二人會否合唱吸引粉絲？心穎笑說：「我唔介意！不過驚馬明怕醜，我自己都鍾意唱歌嘅。」馬國明表示知道心穎學唱歌，之前做活動亦聽過她的歌聲，問到私下可有聽過對方唱歌？他笑說：「冇呀！」
問到準備了甚麼「撒手鐧」放上App？他說：「未諗到呀，知道個App唔係得娛樂嘢，我哋TVB藝人好犀利，可以有好多技能，例如朱千雪可以解答吓法律問題，有啲同事做生意都好叻，不過自己就冇乜嘢分享，但對球隊有啲認識，可以講吓波經。」問到心穎會否表演下廚？她說：「我都唔識，淨係識煮早餐。（馬國明有冇食過？）冇喎！（學煮幾味？）第時先啦，有家庭嗰陣先！」
此外，二人將為《宮》劇到內地拍外景，問到是否已拍畢對手戲？心穎說：「都多對手戲嘅，之後上內地拍會再多啲。」馬國明直言怕熱，出發前會多作準備，心穎說：「我都淘咗好多嘢，有電飯煲、雪櫃，到時可以喺上面收貨！（又話唔識煮嘢食？）可以整All day breakfast！」