委屈否認結新歡 唐詩詠爆喊：講到我好似畀人包
與洪永城宣布分手的唐詩詠昨晚如常工作，傍晚六時半，她駕車離開清水灣半島寓所，到西環拍攝劇集《棟仁的時光》，到埗後助手為她買麵包，並一度急急腳上Crew車，其後再度現身接受訪問，詩詠全程含淚一臉委屈，連番澄清被指另結新歡的傳聞，更一度崩潰爆喊！
唐：唐詩詠
記：記者
詩詠澄清跟「新歡」只是在一個生日聚會上見過面，年初在一個Annual Dinner對方找她合照，當時兩人完全不認識，之後亦只是普通朋友。
唐：佢喺我感情生活上係冇關係嘅人，唔知點解有呢啲奇怪傳聞，我冇辦法考究，唔知點解！我想講篇報道，畀人話我係一個貪錢嘅人，點解講到我好似畀人包咁呢？我呢行都做咗十幾年，一直用我行動話畀大家知我係用咩人生態度生活，我好努力工作，我只不過希望大家睇我作品，可以感動大家，我從來唔係一個貪錢嘅人，以前唔係，依家唔係，以後都唔會係，我嘅世界愛情就係愛情，唔包括呢樣嘢，呢啲咁嘅傳聞對我係好唔公平、好傷害性！
不甘被屈貪錢
詩詠又表示不想外界再將其他人放入其感情世界中，舉例指跟相識逾五年的馬國明一直只是好友，選擇不多作解釋，以為「講吓就算」，但卻愈傳愈真，她為此喊冤：「我做咗乜嘢令人覺得我哋有嘢呢？」
記：咁你有冇盧先生電話，有冇試過搵佢？
唐：唔想講同我冇關係嘅一個人，唔想擺好多人喺我感情世界入面！好似馬明（馬國明）咁，可能影咗啲相係開心傾偈，但都只係朋友。
記：近日係咪大壓力？好大委屈？
唐：食得鹹魚抵得渴，我明白，我預咗畀大家講，但點解我十幾年咁努力做嘢，你哋突然覺得我變咗第二個人，好貪錢咁，點解傳聞去到咁誇張？（邊說邊擰轉面抹眼淚）我……我喺呢度想講拍戲咁多年，大家知我咩人，我呢方面唔可以唔出聲，我要講番啲嘢。
詩詠又表示跟洪永城一直低調處理感情，認為分手原因及時間是兩人的事，毋須向外透露：「對我哋兩個都係艱難嘅時間，想靜靜去處理。」
文：影視組
攝：追蹤組