年初分開洪永城護花：佢係單身！
33歲洪永城（Tony）與36歲唐詩詠拍拖兩年半無奈分手收場，昨日Tony出席活動時扮作輕鬆，他否認「被分手」，並驚爆早於年初已分開，對於詩詠被指另結新歡，Tony仍為舊愛護航。至於詩詠晚上到西環拍劇，含淚否認結新歡，更崩潰爆喊：「我從來唔係一個貪錢嘅人！點解講到我好似畀人包咁！」
拍拖兩年半的洪永城與唐詩詠（Natalie）前日分別在Instagram公布分手，但未有交代原因，有傳詩詠另結新歡，Tony是「被分手」，一直有箍煲打算，故遲遲未肯公布。昨日Tony出席無綫節目《退休地圖》記者會，被追問分手詳情，雖然全程有微笑，但不停狂飲水、搓手，心情緊張，他不諱言：「當然心情都唔好，相信Natalie都係。」之後又驚爆與詩詠已分手一段時間：「大概今年。（年初？）係！」
洪：洪永城
記：記者
性格不一致分手
洪：每對情侶都會嗌交，喺相處上出現分歧，所以決定跟詩詠做番朋友。
記：你哋最大分歧係咩？
洪：可唔可以留番畀我哋自己去……始終我講佢唔好，抑或佢講我唔好，都好似互相數緊對方，我最唔想咁做。
記：涉及第三者？
洪：唔涉及第三者，亦唔涉及婚姻問題。
對於有指詩詠與周焯華手下盧啟邦拍拖一個月，Tony即力撐舊愛：「據我所知，Natalie係單身！」他亦指不認識盧啟邦，亦沒聽詩詠提過他。
洪：最主要係相處，性格不一致先導致分手。
記：邊個首先提出分手？
洪：好和平，冇話邊個飛邊個。
記：傳聞你係被飛，你先係受害者？
洪：傳聞啫！
記：有冇去挽留段感情？
洪：雙方都會有，大家都傷心。
記：喺Instagram宣布分手時有冇眼濕濕？
洪：眼淚唔一定要流出嚟先叫好傷心。
記：知唔知道詩詠係咪一直多人追？
洪：咁大膽，拍緊拖嘅時候都追佢呀？我就唔知，我盡量唔想回應傳聞，因為會衍生其他話題，涉及其他人。
記：係咪隨時迎接新戀情？
洪：應該未，未咁快。
畀唔夠安全感
對於遭網友指摘不懂珍惜「最佳女友」，Tony說：「都唔知點答你。（好委屈？）冇委屈，Natalie的確係個好好嘅女仔，各方面都好好，的確有少少可惜！（復合機會？）唔知，將來事，將來先算。」問到是否花弗形象令詩詠欠缺安全感時，Tony迴避問題，他說：「可能涉及佢嘅諗法，呢啲不如留番畀我哋去處理、溝通。（呢段情你有冇做錯？）邊個男女朋友冇做錯嘢o架？（你算唔算專情男友？）我覺得我自己係嘅。」其後他接受電視台訪問時提到安全感問題，直言做得不足：「我諗係要畀多啲安全感，佢可能唔係好感受到。」其後Tony離開會場，仍有心情跟一對中年男女閒聊幾句，之後握手道別，並駕車返電視城開工。
文：影視組