何遠東瞞住媽咪做手術

何遠東（東東）在由蔡思貝主演的無綫劇集《心理追兇Mind Hunter》中，神級演繹一場弒母戲份，令人留下深刻印象之餘，演技亦得到認同。劇中雖然忤逆弒母，但現實中他是街坊口中的超級孝順仔，趁着母親節將至，更親手包餃子給母親享用作為母親節禮物，他說：「全家都鍾意食餃子，但全家都唔識整，所以大家各自出去學，將整餃子過程變成一家人溝通嘅機會。」

大個仔唔想兩老操心

東東透露由細到大都是肥仔一名，早年驗身發現類似脂肪肝的問題，要注意飲食，更自爆曾因腸道出現問題，要入院接受手術，但因為怕母親擔心，故未有向她透露半句，他說：「我事前冇同佢講係唔想佢哋擔心，加上我記得我入院嗰日，亦係阿爸、阿媽咁啱出發去旅行嘅日子。我都唔想令到父母擔心自己咁多，平時佢哋已經好擔心我嘅工作，自己咁大個仔唔想兩老成日為咗我嘅事而操心，所以一直隱瞞住呢件事。」

每隻餃子都包含住何遠東的心意。	何遠東在《心理追兇》中與蔡思貝有不少對手戲。	何遠東話全家都鍾意食餃子，但冇人識包。

窩心提醒顯關懷

問到東東與父母的關係如何，他說：「由細到大無論我做錯咩事，阿媽就算打都係喊住口咁打，我知打在我身其實痛在佢心，所以我唔會畀自己再做錯。」問到母親節有甚麼說話要向母親講，東東說：「希望阿媽身體健康，繼續青春美麗。你成日提我哋記得飲湯、瞓覺記得冚被，每一個提醒我都好開心。我咁大個仔你仲肯同我講呢啲說話，阿媽我想同你講聲我愛你、多謝你。」

文：專案組

攝：秦健輝

場地：頂好海鮮酒家

服裝：XSXXL、LNBR