楊思琦讚女兒懂事母親節收窩心擺設

藝人楊思琦昨日出席活動，問到母親節是否三代同堂慶祝？身為單親媽媽的她說：「媽媽湊大我已經好辛苦，依家仲要幫我湊埋個女，大家齊齊整整就好。」又指女兒過往母親節會將上堂做的勞作送給她，但今年較特別：「佢見到一個整花活動，好想整花畀我，最後整咗花同草嘅擺設送畀我，唔理靚唔靚，係意義重大，感覺佢好懂事。」

而同場的歌手麥潔文則表示父親於月初病逝，談到喪禮事宜，她指將於本月25日在世界殯儀館設靈：「其實好感恩，因自己畫展4月尾先完，啱啱最後嗰日，工人打嚟話佢氣喘入院，過2日爸爸就走咗，如果件事喺畫展期間發生就好辛苦。」她又坦言早前收拾父親遺物時忍不住落淚。