許廷鏗過檔遇阻滯自由身搵醫靠

許廷鏗（Alferd）於2009年參加無綫舉辦的第一屆《超級巨聲》勇闖樂壇，憑獨特唱功及「將軍澳吳尊」之名獲星夢揸Fit人何哲圖（Herman）簽約成為歌手，在無綫及Herman聯手力捧下成為「星夢一哥」，所唱歌曲均登上《勁歌金曲》榜冠軍位置。由於Alfred上月底與無綫及星夢約滿，年初已傳他決意離開娘家過檔華納。

回復自由身的Alfred坐定粒六過檔接會離巢的「華納一哥」周柏豪棒，可惜近日傳出華納突然「煞停」，令Alfred「兩頭唔到岸」。原來他突然改變將經理人合約一併簽給華納的意願，有意自組公司做製作，只將歌曲交由華納發行。華納見唱片市道低迷，幾乎出一張唱片就蝕一張，故表明要簽埋經理人約先有得傾。娛樂工作被迫叫停的Alfred幸仍有牙醫工作，近日他頻頻到診所開工。

一心打算過檔的Alfred今次真係頭都大埋。 「簽唔成約又被封殺，點搞呀？」（設計對白）

Herman昔日十分看重Alfred，更力捧他為「星夢一哥」。

Herman叮囑靠自己

據知，Herman得悉愛將堅決離巢既傷心又憤怒，認為對方不懂飲水思源，更傳出無綫將Alfred列入「不受歡迎」之列，不會力推其新歌或讓其打入音樂榜三甲，可算全面封殺。

Herman昨日在電話中承認與Alfred已約滿：「係約滿咗，佢話想出去闖吓，咪由佢囉。（覺得佢唔飲水思源？）每個年代睇法唔同，當然公司一直都好栽培同對佢好好。（無綫列佢入黑名單？）當然佢之後嘅歌唔會話有高播放，公司一直投放好多資源喺旗下藝人度，以自己藝人行先。」隨即叮囑Alfred：「將來佢要靠自己嘅資源同平台。」

而Alfred則回應說：「入行六、七年都係同一公司，面對轉會關口都唔係好識拿捏，多謝伯樂Herman由細睇住我大，希望嚟緊日子可以保持良師益友關係，轉會暫時唔算話太急同阻滯，想畀時間同空間自己諗吓方向點做，有咩新消息會同大家公布。」另外，華納發言人承認對Alfred感興趣：「呢刻未落筆簽任何合約，將來有喜訊通知大家。」

文：音樂組