美國真人騷女王Kim Kardashian的言行一向出名受爭議，前日她在社交網Instagram公布最新表情符號「Kimoji」時，其中一款竟然將自己化身成「聖母瑪利亞」，並好揀唔揀揀正4月20日即美國「全國大麻日」來發表，立即被喪插對聖母欠尊重及愚蠢！
一向出名惹火的Kim Kardashian前日公開自家表情符號，將自己Key在聖母身上，由於前日正是美國「全國大麻日」（National Weed Day），Kim個Emoji更加入特效營造迷幻效果來慶祝，即被網民留言猛烈抨擊！
以聖母形象出Emoji呃Fans錢仲唔夠，Kim竟然推出埋「聖母Kim」圖案的蠟燭、火燒大麻圖案的襪及屁股形煙灰缸等發售，Kim好玩唔玩竟然惡搞聖母，當然令網友不高興紛紛在社交網留言狠批，有網友認為她的做法相當愚蠢，對聖母及天主教有欠尊重並要求即時下架，就連Kim的粉絲都睇唔過眼留言說：「我愛你Kim，但今次真係好唔尊重。」還稱要從此取消關注Kim的社交網Instagram。
不過Kim一於好少理，前日穿上心口印有聖母圖案的黑色緊身衣與姊妹外出拍照，擺明唔怕人抨擊！其實唔單止Kim，她的歌手老公Kanye West都愛以發音似「Jesus」（耶穌）的「Yeezus」自居，曾同樣被批評對宗教不敬。
除了Kim化身聖母闖禍，美國樂壇天后Katy Perry日前因在Instagram貼了張惡搞印度真神的照片來表達近期的情緒而同樣被網友圍插！網友指該張圖片可恥及有冒犯性。有疑似印度粉絲更直斥她對印度真神欠尊重，叫她不要將自己同真神Kali Maa相比！
文：外娛組