周秀娜兩蚊都冇憂三餐 欣宜胖隨成長壓力爆煲

C：Chrissie

J：Joyce

孤獨女VS開心果

由彭秀慧執導的電影《29+1》講述兩位個性截然不同的女生，面對踏入30歲所發生的人與事及面對方法。Chrissie在戲中面對沉重的工作壓力、與男友的感情轉淡，因而害怕踏入女性的天敵——30歲。Joyce則是個樂天女孩，每日嘻嘻哈哈的生活，即使30歲亦沒甚麼大不了。

C：我個角色似現代女性，對事業上有追求、冇時間同男朋友相處，拍呢部戲嗰時，我正正就係29+1，戲入面情節都經歷過。

J：我個角色似我自己，樂觀底，但角色同自己最唔同嘅係，角色遇到唔開心時，唔會覺得呢個包袱會拖累自己，反而係因為呢個包袱而成長。

兩人出身背景不同，但對工作的態度一樣充滿熱誠。	欣宜雖然羨慕周秀娜的弗爆身形，但不會刻意減肥而失去自我。	欣宜與周秀娜於新片《29+1》有不少內心戲，盡情發揮演技。

C：拍嗰陣都影響到現實情緒，因為我好多時候係對空氣做，當獨自面對問題就會愈諗愈錯，成套戲我都自己一個人做咁，連生活都好似做緊角色。

放大圖片	放大圖片	周秀娜是性感女神，就算不拋胸，一舉手一投足都充滿魅力。

模特兒VS歌手

Chrissie從模特兒出身，做o靚模時出爭議性甚高的人形攬枕，近年慢慢轉戰影圈，今次拍戲終於可以收起性感，用內心戲證明她有身材更有演技。歌手Joyce亦開始涉足影壇。二人出道方式不同，卻同樣踏上演員路，演戲是否適合二人呢？

C：我畢業做過sales、派傳單，不過都幾悶，幾怕以後都會咁。其實都冇諗過會做呢一行，後來有機會到，唔試過唔知成唔成功！但拍戲係我想要，因為唔怕失去，覺得唔適合咪走囉！我諗你比我更早接觸呢行，你會知清楚啲。

J：我又唔係早入呢行，我都係跟入TVB睇獎門人咁啫。其實屋企人從來都冇話要培訓我入行，佢哋係想我讀多啲書。以前讀電影製作，我都冇諗過有一日我會做演員。以前對自己外表冇信心，但拍戲要放低自己，我唔得囉！唱歌就合埋眼，演戲就係樣樣都要，要畀人睇、要畀人聽。拍戲都係誤打誤撞，但我係樂意嘗試新嘢嘅人。

窮家女VS幸運星

Chrissie一步一步捱出頭，現在無論拍劇還是拍戲都擔正做女一。Joyce則是星二代出身，看似身邊有不少長輩扶助她入娛圈，但事實上卻波折重重。二人入行後，經歷過甚麼低潮？

C：我哋係好唔同，但我覺得你有唔同嘅壓力。如果我有咁嘅既定形象，可能會框死咗自己就仲大壓力。初初入行嗰陣真係擔心三餐都成問題，試過連兩蚊都冇，冇錢到要喺屋企食烏冬，個烏冬仲要係我細佬畀我！食咗之後咁下一餐點呢？當時冇自信到都唔知自己想點，生活話畀我聽，我係咪應該要去搵一份穩定收入嘅工作？

J：雖然冇資格講我捱過，但我有辛苦過！我係一個幸運者，以前唔識得將包袱變成一個動力，淨係覺得大家對我好唔公平，我又唔係專業演員，點解大家要咁憎我？咩事啫？我又唔係正式入行！入咗行之後，我未出嚟就已經畀人鬧，依家先慢慢學識，原來時間可以改變一切。

C：我雖然係擔心生活，但都唔係擔憂嘅。做Model係可以維持到我嘅生活，只係有時工作完啲錢未收到咁啫。

J：我都有諗過我係咪唔適合做呢行，我係好有自己想法嘅人，但大家嘅想法同我唔一樣嗰陣，就會諗我係咪真係咁乞人憎？大家對我最大嘅誤會就係以為有好多前輩睇住我，但其實我唔係一個識keep關係嘅人。作為星二代，我冇得揀，但喺我世界入面，我有最好嘅婆婆同媽媽，呢個就係我生命，冇咁多以前嘅經歷都唔會有今日嘅我。

完美身形VS不瘦降

Chrissie擁驕人上圍、長腿及纖腰，是「女藝人」的標準形象。Joyce試過減肥減到失去自我，不過近年她不再介意別人眼光，只望肥得健康。二人對於身材有何看法?

C：其實keep住身形係我對工作嘅尊重，一到放假我就咩都食，我都係鍾意食濃味嘢嘅人，唔需要為工作做準備我都會食o架。至於做運動，我係為咗keep體力去應付長時間嘅拍攝。

J：我依家最佳狀態就係我最舒服嘅時候，唔使諗坐低會唔會有肥膏，咁先散發到我獨有嘅嘢出嚟。肥唔等於自暴自棄，我肥番三年，但做嘅運動係多過瘦嗰十年。

何為真正女神？

Chrissie是宅男女神，Joyce則憑歌曲《女神》成為網絡女神，到底二人對「女神」有何定義？Joyce說：「我心中嘅女神，工作嗰陣會有光芒，又會肯幫人，呢啲唔關靚唔靚事。」Chrissie直認「宅男女神」的名銜是一種負擔：「我覺得『女神』係唔介意人哋點睇自己，同埋有性格。」

文：雲妮

攝：司徒國榮

周秀娜化妝：Circle Cheung @ ND&Co.

髮型：Amber Tse @ QUEEN'S PRIVATE i

服飾：MCQ @ I.T

鄭欣宜化妝：Samuel @ 江中平化妝室

髮型：Milk Chan @ Xenter

造型：Constance Lee