劉嘉玲專買冷門贏幾萬捐晒！
女星劉嘉玲及何佩瑜（Jeana）前日不約而同得到幸運之神眷顧贏馬，Jeana更有份拉頭馬，認真叻豬！而嘉玲則認為這是幸運錢，會將數萬元彩金捐作慈善用途，又指自己其實不諳賭馬，所以不打算做馬主。
前日嘉玲在社交網站上載一張站在馬場看台的照片，並透露贏了馬，不少網民留言恭喜；另邊廂Jeana亦現身馬場撐馬主好友，更一起拉頭馬。昨晚嘉玲以黑白格仔及波點裙現身lv活動，分享她的喜悅，她說：「其實我唔識跑馬o架，淨係會買晒冷馬，每場買三、四隻，買獨贏同位置。我用咗幾千蚊贏咗幾萬蚊，好有意頭。（會點樣用啲彩金？）我覺得呢啲都係幸運錢，會捐晒出去。（老公梁朝偉識唔識跑馬賭錢？）佢完全唔識買，一啲興趣都冇。」
冇興趣成為馬主
問到向來瓣數多的嘉玲會否有興趣做馬主？她即耍手說：「唔好喇，呢啲好大工程，跑吓馬、拉吓頭馬就話冇所謂！」又着記者應該請教天王郭富城，因為對方很在行。嘉玲又被問到去年在金像獎說笑指郭富城不夠顧家和專一，今年即成家立室？她笑讚城城聽話，又認為結婚是緣分：「兩個人一齊組織家庭，呢啲係一個緣分，以前一齊咁多年都冇開花結果，一齊咁短時間就結婚，真係估唔到，佢不嬲係長跑選手，可能屋企有畀壓力佢，佢都差唔多年紀。（話佢雙喜臨門？）係就好，佢同我同年o架 ！」
撐老友愛駒出賽
至於前晚現身馬場拉頭馬的Jeana則透露是撐朋友愛駒，更小試牛刀買了二十元，大呻自己笨，她接受電話訪問時笑說：「我唔識跑馬，不過買咗廿蚊支持佢，都贏咗九十蚊o架！」至於男友翁子光就因要工作未能與她一起入馬場，她更踢爆男友喜歡賭馬，但只會小賭怡情！
文：名人組