Bobby陳豪調戲人妻最想操邊條？
無綫藝員陳豪及歐陽震華（Bobby）「雙劍合璧」，大講有味笑話「調戲」拍檔田蕊妮，更拖阿田老公杜汶澤落水，搞到平日口若懸河的阿田頓時語塞。阿田隨即「反踢爆」Bobby為食，外景期間要求專人服侍。
陳豪、Bobby、阿田及姜大偉日前齊集西環一間懷舊茶樓，為無綫重頭新劇《誇世代》拍攝外景，劇情交代Bobby被太太阿田捉去品茗，卻遇上爸爸姜大偉及歡喜冤家陳豪。鏡頭前Bobby與陳豪交惡，不過私底下卻默契十足，夾計將矛頭指向阿田。
加操為騷肌
提到被安排於劇集內騷肌，陳豪笑說：「拍咗一場嘞！睇吓監製使唔使重拍，我同阿聰（張繼聰）住埋同一屋苑，可以約去會所健身。阿聰好勁，跟佢學到好多嘢，佢甚至連一條肌肉上半截同下半截點操練都有研究。」Bobby聞言即轉向問阿田：「不如你返屋企問吓你老公（杜汶澤），男仔最想操邊條（肌肉）吖？」陳豪加把嘴說：「係想玩『粗』邊條呀？」搞到平日膽生毛兼伶牙俐齒的阿田頓時語塞，不懂反應。
留肚歎點心
阿田當然不會就此讓Bobby得逞，即還擊踢爆他非常饞嘴：「頭先我搭lift上嚟，淨係聽到個經理好緊張咁喺度講，話歐陽震華要食點心囉！有專人服侍呀！」Bobby靦覥說：「咩呀？嚟呢啲地方梗係想食點心啦，點知原來師傅已落場，我梗係叫經理幫吓手啦，況且我留咗肚，唔算好為食啫！」原來「咖啡王子」陳豪亦對中茶情有獨鍾：「其實我都鍾意同阿哥去深水埗，搵啲最舊式嘅茶樓叫山竹牛肉，每人送碗白飯呀！」
至於姜大偉於戲中與李家鼎有洪拳對打戲，二人寶刀未老一take過，就連阿田亦大讚：「佢哋就打得好睇啫，我喺戲內都跟老爺（姜大偉）學嘢，有場打戲唔識借位及用力，打完兩隻手臂紅晒囉！」
文：影視組