「志偉」醉到吊吊揈？曾國祥笑爆：有啲似
近日網上瘋傳一條名為「疑似曾志偉醉酒跳舞」的短片，片中人竟與志偉有八成相似，不但High爆手舞足蹈，更全身赤裸任由下體吊吊揈，認真爆笑！相似程度之高，連志偉囝囝曾國祥「欣賞」後都忍不住笑道：「確實係有啲似！」至於好友譚詠麟則謂要睇冇格仔片，並笑說：「我認得嘅！」
藝人曾志偉出名酒膽大但酒量淺，幾乎次次去Party都飲至酩酊大醉，更好幾次「不負眾望」被抬走離場，本月14日正日生日的他就孖住陳百祥老婆黃杏秀開P慶祝踏入64歲，撞正日前又在金像獎奪得「最佳男配角」，可謂有晒開懷暢飲「醉」佳理由。近日網上瘋傳一條主題是「疑似曾志偉飲醉酒跳舞」的短片，片中的男士全身赤裸在船上High爆手舞足蹈，一絲不掛任由重要部位吊吊揈，超開放勁大膽！雖然片中人的身形、樣貌均與曾志偉相若，驟眼會以為他是曾志偉本人，但望多兩眼就發現只是人有相似，純粹笑料一則。
阿叻讚好舞功
雖然片中人是否曾志偉觀眾心裏有數，但片中人的行徑的確令人爆笑。當本報記者向曾志偉囝囝曾國祥轉發此搞笑短片後，他一路笑一路講：「確實係有啲似嘅，但肯定唔係佢，做仔嘅一定睇得出，我都唔知講咩好，但條片真係幾好笑。」
曾志偉的多年好友陳百祥（阿叻）欣賞完「演出」後，亦忍不住大讚片中人舞功了得：「跳得幾有節奏呀！（覺得似？）幾似呀！」另一好友譚詠麟（阿倫）亦幽默地在電話中笑說：「你嗌佢放條冇格仔嘅片畀我睇吓先，我認得嘅！」說罷更騎騎大笑。
文：影視組