楊冪藍籌索妻劉愷威點捨得放手

忙到嘔冇時間放閃

楊冪劉愷威離婚嘅傳聞就好似月事一樣，幾乎每個月都「報到」，點都會傳一次！本來兩公婆曾經出埋聲明否認離婚，可惜停止唔到謠言！早排一張當街激吻照喺網絡瘋傳，雖然事後查證為舊照一張，但依然有大批網民討論，而兩公婆難得有時間孖住湊女，竟然又被人話根本冇交流！結婚前，兩公婆成日喺微博肉麻放閃，婚後呢啲骨痹行為幾乎絕迹，又成為婚變嘅有力證據之一！

你估淨係楊冪多戲拍？劉愷威每年拍劇至少三部，產量勁過香港啲所謂視帝，誇張到有段時期，佢五部劇集喺同一個時段嘅不同電視台播放！有數得計，大家都係得24小時，仲要抽時間返嚟湊女，仲邊有咁多閒情逸致喺微博玩文字浪漫？

女漢子食泥都唔拘

楊冪同我Nuts哥講過，佢唔怕辛苦，想每日都接觸吓新事物有新刺激，覺得咁樣做人先夠充實，唔想個女大個時，以為阿媽只識煮飯，同呢個世界脫晒節！佢仲話家庭係動力多過係束縛！查實識楊冪嘅，都知佢係有碗話碗，想做就做，天不怕地不怕，典型嘅北京女子。依家內地咁興真人騷，好揀唔揀，楊冪偏要揀唔辛苦唔做嘅《真正男子漢》，入面要當兵受軍訓，即係冇靚衫着冇得化妝之餘，堅要日曬雨淋，有集仲慘到要食泥，點解要搞到咁？就係夠薑，要挑戰自己！對楊冪嚟講，真係濕濕碎，佢賭得最大嘅一鋪，係當年最紅時，走去結婚生女，唔似得有啲星要匿埋生玩秘婚，坦蕩蕩話結就結，話生就生！生完連坐月唔使半年又開工，到依家都做到冇停手，仲同唔少內地「小鮮肉」如鹿晗等合作，有「小鮮肉收割機」之稱，點會估到生完B好似冇生咁，仲少女味過以前！

「自黑」對付刁民

楊冪EQ同IQ都非常高，兵來將擋，咁耐以嚟面對網民嘅批評，四両撥千斤，全靠玩「自黑」！內地用語「自黑」一詞夠傳神，即係唔怕你寸我，我自己都寸埋自己一份！吹咩？擺明係「要贏人先要贏自己」嘅態度！由以前無端被人話腳臭，到近排喺《三》劇被人話佢髮線高面臨脫髮，佢全程玩「自黑」輕易化解閒言閒語。早排佢喺微博話：「我是一個禁不住批評的人，如果你們批評我，我就去植髮。」即刻引嚟超過10萬網友留言同100萬點讚！之後楊冪仲話趁佢依家仲幾靚仲有頭髮，快啲去睇部劇，遲幾年就冇o架嘞！就係一副「自黑」態度，本來寸佢窒佢嘅網民，不單止吹佢唔脹，反而更buy佢！

查實劉愷威呢個老公都唔惹小，做過股票買賣嘅佢梗係識計數，知道楊冪值得長揸！老婆又靚又食腦，仲放晒手畀晒自由，老婆鍾意做乜都得，唔會綁住佢喺屋企湊女，而且仲可以齊齊搵錢！所以劉愷威每次現身都唔答婚變傳聞問題，梗係慳番啖氣暖肚好過啦！

Nuts哥