郭富城默認做老竇：梗係雙喜臨門
剛做人夫的郭富城，昨晚穿上啡色格仔西裝出席路易威登的「時空‧錦‧囊」展覽，雖然手上未見婚戒，但風騷到即場轉身跳舞。他首度開腔分享結婚喜悅，盛傳其太太方媛雙喜臨門，已懷有「城種」，他默認笑說：「梗係啦，個『囍』字係由兩個喜字合成，仲唔係雙喜臨門？我會努力。（未夠3個月唔講得？）呢個真係一個好嘅問題，畀啲時間我，適當時候就會同大家分享。」
想媽媽早日抱孫
他坦言人生大事是希望媽媽看到他結婚，婚宴上看到媽媽開心，他更為感動：「下個人生計劃，真係希望上天畀到份禮物我，媽媽就可以喺有生之年抱到孫。作為一個仔咁多年，都希望喺適當時候做適當嘅事，依家成家立室，下一步就一定係開枝散葉。（想要幾多個小朋友？）邊有咁快，一步一步嚟，奶粉錢唔係好貴，我努力工作都可以應付得到。」問到方媛是否100分太太？他說：「100分，咁私人嘅嘢唔講住。」並承認太太目前在港，有傳方媛有喜，獲郭媽媽獎勵100萬，城城直斥是虛構傳聞，一笑置之。至於為何未有戴婚戒？他解釋是尊重出席的品牌活動。
對於台灣製作人邱瓈寬因未獲邀請出席婚宴而生氣，城城笑說：「寬姐不嬲都係個開玩笑嘅人，佢夠話佢將來結婚唔請我啦！（佢話下次你結婚記得要請佢，嬲唔嬲？）佢開玩笑，一定講到盡，點會收？但我認識嘅佢唔使咁認真，佢有打畀小美衷心祝福我。」他又表示人生每個階段都要學習，問到是否學習做爸爸？他笑說：「希望，希望承你貴言。」
同場有林嘉欣及文詠珊（Janice Man）等，當中穿大露背裝的JM非常性感，她笑言黐了很多膠紙。至於嘉欣與城城曾多次合作，表示有恭喜對方，但未想過分享湊仔經，因為每個家庭教育子女的方式都有不同。