王梓軒教路唱歌唔使計數
內地歌唱選秀節目《快樂男聲》即將載譽而歸，為熱愛音樂的男士提供發光發亮的舞台。最近節目於各地展開選拔賽，片段上傳至網絡後引起不少回響。日前製作單位首度來港招募港澳台區唱得之人，擔任星級評判的歌手王梓軒（Jonathan）及音樂人張家誠（Alan）大讚參賽者出色，更分享能夠打動評判的貼士！
Jonathan及Alan日前為《理想集團呈獻2017快樂男聲港澳台區選拔賽初賽》擔任星級評判，當日部分台灣參賽者未能到場，大會特別安排他們網上面試。Alan大讚參賽者質素高：「有個人特色嘅參賽者真係幾出色，呢個好難得。」他特別記得一位高大的參賽者，不但自行創作歌曲，演繹時亦有獨特的味道。而Jonathan就對另一位帶點傻氣的參賽者印象深刻，認為對方能夠吸引觀眾：「我哋想知佢個人係點、談吐係點，就算佢傻傻更更咁，真係好討人喜歡。」
張家誠強調「隨心」
Jonathan坦言着重各人的演繹及音樂感，最欣賞參賽者有個人風格，不過選曲不一令評分十分困難：「我會留意佢有冇潛力再爆發，因為呢度只係第一站，希望佢喺更大嘅舞台發揮更大嘅潛力。」他寄語參賽者謹記評判的意見，又提醒他們不要猜測評判的心意，應該把握時間展示強項，另外亦要經歷人生：「你吸收嘅嘢好影響到你，平時多啲打開眼睛、耳朵，要好『飢餓』咁鍾意音樂。」Alan強調比賽的頭一秒十分重要，有參賽者因緊張而未能迅速投入，白白浪費了機會。提到是次主題「隨我」，Alan說：「有啲參賽者好多諗法同計算，放唔開懷抱盡情唱歌。其實除咗『隨我』，仲要『隨心』，將自己嘅感覺放晒出嚟先可以打動我哋。」
把握自己文化特質
《快樂男聲》的參賽者來自不同地區，曾到內地參賽的Jonathan認為要好好把握自己的文化特質：「內地可能有啲人唱得好澎湃、高亢，你扮佢係冇用，因為佢成長嘅環境令佢有呢樣嘢，你依家先學已經太遲，不如做一啲我哋先有嘅嘢。」Alan表示每位參賽者都應該了解自己吸引人之處，並且真實地表現：「最有感染力嘅歌，都係歌者唱番自己嘅故事。」Jonathan續說：「無論你唱咩語言，就算我唔理解或者唔認同你嘅經歷，只要感受到你真心唱，啲感情就嚟晒。」
文：音樂組
攝：劉智源
場地：七重天餐廳